摸魚手劄：股票飯局的小故事
股市日日跌，所以我也有執一執倉，策略性減持一下股份，同時又見跌買入了一些新股。雖然個市連跌，大路估計都是跟A股下跌。話雖如此，我的孖展卻沒有減，所以這一次到底成魔還是成仙真是一線之差。不過身為一個全職炒家，都是馬照跑，舞照跳，風照收，飯照食。既然市況這麼差，
那我就分享一些關於飯局見到的小故事。
渾水記得幾個月前網上流傳了一段錄音，大致上一名男子，變女聲冒認啟用電話服務，非常搞笑。
剛好，今日渾水又出現在最多風收的飯堂吃飯，坐對面枱就活生生見到一個「怪咖」，明明是一個高大威猛的男子，卻壓底了聲線變音講電話落盤，我和朋友面面相覷，大致估到是甚麼回事，不過我們忍笑也忍得好辛苦。
又食食嚇飯途中，對面枱有一個專業投資者跑過嚟搭訕：「喂！我隻嘢無啦啦多咗2千幾萬。你哋頭先個個輪住去廁所，係咪全部借尿遁入貨？」和我同枱的幾位朋友都曖昧地陪笑。
同枱食飯，各自修行，大家雖同坐一枱，但個個入貨出貨。甚至，連對面的大炒家都會過嚟搭兩嘴。
一個trading day的下午，一群人可以既食飯，又互通消息，兼social打牙骹，再炒股票，所以這班金融才俊真是好懂得善用時間。這樣的炒作氣氛，大家都忙著賺錢，所以我覺得個市還是幾樂觀，有得炒下去的。
下隻潛在賣殼券商股
證券股可以賣的都賣得七七八八，尤其是最近賣出的華富（952），對家可謂非常厲害。如果要追落後的，那就只好向剩下的滄海遺珠下手。新華滙富（188）現在市值只有17億多，幾日前都宣佈以先舊後新配售新股，兼擴大後股本12%，較停牌前折讓16%，算幾進取，逼近一般性授權上限。
這一次配售是以先舊後新形式進行，而不是單純的配新股，好處在於比較快，這手貨可以先落入配售代理袋中進行分配，再替大股東補回舊股。如此推測，也許好事快近了。
追溯到上年12月，新華滙富主席等人向Sunwah鎖定的股東收購股份，這個操作可能是鋪路賣殼的第一步。現在，只差在幾時有好消息跟尾公佈，以及假如賣殼當真成事，整個交收方式又如何進行，新主的真身又是哪路人馬。
渾水
http://www.facebook.com/muddydirtywater
本欄逢周五刊登
渾水
摸魚手札 - 渾水 舊文