魚樂無窮：人見人愛的逆市奇葩
■港股六連跌，累積跌幅逾千點。資料圖片
港股六連跌，累積跌幅逾千點，大戶一邊用重磅股托住指數，另一邊瘋狂沽個股，陰乾味濃。君不見近期滙控（005）呈強，而熱炒板塊如鐵路及內房四腳朝天嗎？如果高位買落成手貨，利潤肯定唔見一大截，唔好彩更會見紅，究竟要點做？這
視乎閣下嘅持貨比例，如果孖展出擊，最好減下磅，事關後市越跌，入肉指數越高，今日唔沽，聽日唔沽，最後到見底日先沽，何苦呢？沽貨對象首選冇基本因素支持嘅細價股或消息股，無他，旺市時棚氣十足，跌市時買盤可以完全消失，趁而家買賣仍積極先沽貨，取回子彈候低撈大價股，方為上策。現金倉？繼續坐吧！
路訊通（888）一度炒高4%，埋單隨市微跌一格，但近日走勢極靚仔，大市跌千點，佢照升半成，成交更創兩年新高，冷門股突然有資金捧場，唔可以輕視！
「唓，啱啱你先叫人唔好掂細價股喎！」冇錯，但只限冇基本因素支持嗰批。睇睇路訊通份成績表，連續三年有錢賺，兼有豐富派息，狀元級數，最新息率高達8厘，完美食正呢轉risk on潮，有意思！加少少想像力，公司貨源歸邊（大股東載通（062）揸貨73%）、業務簡單（主打巴士廣告）、財政狀況健康（4億現金零負債），說穿了又係靚殼一隻。基本因素、技術走勢、財技角度全部拎滿分，四個字總結︰人見人愛！
唐牛
https://www.facebook.com/tongcow88
唐牛
魚樂無窮 - 唐牛 舊文