魚樂無窮：麻將心法應付大牛市
■7月翻身機會極大，執位後下一個四圈再博殺吧！ 劇照
四方城內144隻牌，可以有無限配搭，但作為一個麻將高手，目標只得兩個︰1.食一兩鋪大牌，務求拋甩對手；2.盡量減少出沖，保住手上籌碼。前者任你點叻，都要運氣搭夠，後者技術含量則非常高——觀察三家牌路、
控制情緒、計值博率，短時間內要作出正確抉擇，真係少啲腦力都唔掂。如果成功做到後者，手風唔順可以輸少啲，有運嘅肯定大殺四方。
細心想想，今年炒股要贏錢，正正要依足以上心法︰今年頭三個月，塘水滾塘魚，高低波幅唔夠兩千點，用死嚇死嚇嚟形容已經好畀面，更遑論要贏錢。踏入4月份，北水調炮製港股大時代，恒指一舉衝破二萬六、二萬七、二萬八，個股倍倍升幅比比皆是，仲要日日千億成交，散戶無不笑逐顏開。去到五、六月，高位屢攻不破，壞消息更接二連三出現，指數再次拾級而下。只要守到五個月陰乾市，足以力保不失，好彩食正一個月大升浪，更加贏到開巷。
恒指今年暫升13%，睇睇自己股票倉，如果今年回報超過呢個數，恭喜你！一來跑贏大市，更重要係你成功掌握炒股節奏。跑輸大市？唔緊要，雖然五窮六絕好大機會再應驗（恒指5月跌2.5%，6月暫跌3.1%），但不明朗因素過後，7月翻身機會極大，執位過後，下一個四圈再博殺吧！
唐牛
https://www.facebook.com/tongcow88
唐牛
魚樂無窮 - 唐牛 舊文