中環在線：擬推紀念鈔 指換購方便
中銀寸滙豐添麻煩
■嶽毅透露中銀2017年會發行百周年紀念鈔。 何家達攝 
滙豐150周年紀念鈔由有得炒變成炒燶了，領鈔安排混亂，亦令到唔少抽中嘅市民面燶燶，成為市場熱話，中銀香港（2388）副
董事長兼總裁嶽毅忍唔住都要抽嚇水。佢話，中銀正籌備喺2017年發行100周年紀念鈔，希望到時嘅流程「高效且簡易」，仲話「一定不給市民在認購紀念鈔的事上添麻煩」，明寸滙豐喇。
■滙豐早前換領紀念鈔安排，被轟混亂。 嶽總寸完滙豐哈哈笑
嶽毅噚日喺中銀香港股東會上提到，2017年係中銀香港成立100周年，中銀香港幾代人與香港人經歷風雨，見證香港每一個發展，為答謝大家，現正籌備包括發行紀念鈔嘅一系列慶祝活動。中銀已經同監管機構傾緊，但係暫時未能公佈面額與發行量。
雖然發行紀念鈔只係慶祝活動其中一炮，不過佢哋依然嚴陣以待。嶽毅話，屆時會根據市民嘅踴躍程度，合理配置資源，設計好「高效且簡易」發行紀念鈔嘅流程，為廣大市民提供一個方便、快捷嘅認購程序，仲講明「一定不給市民在認購紀念鈔的事上添麻煩」，之後仲「哈哈」咗兩聲㖭！
其實中銀香港過去已經有兩次發行紀念鈔嘅經驗，2008年中銀有印發奧運鈔，2012年就幫母行中行（3988）發行百周年紀念鈔。
人多難免會出現混亂，但今次嶽毅拍曬心口咁，講明會參考滙豐銀行發行紀念鈔嘅情況，「吸收他們好的地方，不足的地方就予以檢討」。老實講，滙豐嘅領鈔安排真係好需要檢討，被嶽毅寸一兩句都應該無話可說。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文