中環在線：
嶽少禦廚．摘星隨緣
■Bombana十分喜歡身旁以琉璃彩瓶與酒瓶嘅裝飾。 羅君豪攝 
識飲識食嘅林建嶽應銀娛（027）邀請，去澳門銀河二期開設意大利餐廳81/2 Otto e Mezzo Bombana，餐廳最近開業，
負責主理嘅米芝蓮三星名廚Umberto Bombana上星期過大海視察新店，問佢會否以「摘星」為目標，佢輕輕鬆鬆話「要來就會來吧」。
喺中環嘅81/2 Otto e Mezzo Bombana連續4年獲米芝蓮三星，大家自然對澳門分店有所期待，有壓力應該在所難免，誰料Bombana處之泰然。
佢坦言，唔會有太高嘅摘星期望，只會交出最好嘅東西，買最好嘅食材、最好嘅酒。澳門店有八成菜式跟香港店一樣，Bombana希望等到經營情況穩定下來，陸續增添澳門獨有嘅新菜式。
「我哋嘅工作係煮，別人（米芝蓮評審員）來判斷，各有各做」Bombana指，米芝蓮評審員經常轉換，可以係男或女，甚至係熟客。所謂口耳相傳，評審員又會跟其他食客傾偈去了解餐廳嘅情況，當佢哋聽聞餐廳質素下降，又可能再來視察，所以Bombana只可以做好本份，能否摘星？「要來就會來吧」！
■澳門分店的酒窖藏有1,800支酒，七成是意大利酒。 
■澳門店門外放了一幅意大利藝術家Gianluca Miniaci的作品。 
【澳門分店獨有】意大利寬麵配和牛與黑毛豬肉 390澳門元 
【招牌菜之一】意大利Burrata芝士餛飩 240澳門元 
■智能手機功能讓Bombana輕易跟其他分店的主廚溝通。 用Whatsapp分享新菜式
除咗港澳，Bombana喺京滬亦有分店，Bombana選擇九成時間留港，他話多得科技發達，佢可以用Whatsapp跟其他分店嘅主廚聯繫，大家可以隨時分享新菜式、畀意見。
老實講，華華見過唔少星級名廚，個別雙眼有火，一望而知保住米芝蓮星星何等重要。Bombana都有火，但佢團火係內斂嘅，加上佢圓碌碌，臉上又經常掛住親切嘅微笑，如果以武俠小說去形容，佢就似身懷絕技嘅神秘高手。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文