陸羽仁 BLOG 2015年6月1日
資金流入
2015/06/01 08:42:15
網誌分類: 經濟
5月份最後一個交易日，全球主要股市都係麻麻哋，中國股市上星期五大玩過山車，上證綜指全日高低波幅達到6%，收市則接近打個和，港股微跌收場；歐洲股市因為希臘還債的死線臨近，市場情緒受壓而大跌，其中德國股市及法國股市
齊跌超過2%；美股亦唔好過，受到美國經濟數據唔得嘅拖累，反覆偏軟。杜指跌115點，收報18011點；標普500指數收跌13點，報2107點；納指跌28點至報5070點，三大指數跌幅都係0.6%。
總結美股5月份表現，杜指及標普500指數都有1%進賬，納指更大漲2.6%，又跑番贏香港。
美國經濟增長數字有點令人不忍卒睹，美國商務部上週五公佈今年首季GDP增長終值，由於由於企業庫存增幅的縮小和貿易赤字的擴大，此前的輕微增長0.2%，大幅向下修正至負0.7%。其次，美國5月芝加哥採購經理人指數(PMI)從4月的52.3降至46.2，市場活動由擴張變成萎縮，遠差過市場預期，跌得最多嘅係新訂單指數。另外，美國5月密執安大學消費者信心指數由從4月的95.9降至90.7，亦創下六個月新低，跌幅為2012年底以來最大。
不過，市場似乎對咁弱雞嘅經濟數據，反應唔係好大，美股只係輕微回調0.6%，仍然接近歷史高位。我覺得原因在於經濟表現唔好，但市場睇得仲差，據MarketWatch的調查，經濟學家平均預期係GDP收縮1%，結果縮0.7%已經算好。而市場預期5月消費者信心指數會下跌至89，結果係90.7亦唔錯。經濟唔得，投資者對聯儲局提早加息的憂慮下降，對市場有番啲支撐。
另外，美元兌6隻主要貨幣匯價的美元指數回軟，兌歐元回落至1.1美元，大宗商品市場漲價壓力舒緩，有消息指美國的油鑽井平臺數目減少，中東局勢緊張，令油價得到支持，紐約油價上週五大升5%至每桶60美元樓上，能源股反彈，杜瓊斯能源指數持平，告支撐住大市。
今個星期美國亦有一大堆重要的經濟數據出爐，其中包括ISM製造業數據、汽車銷售數據，以及週五的就業數據，數據得唔得，將引起市場對聯儲局幾時會加息的直接聯想，估計會引起市場一波動。不過，比較重要的仲係外圍因素，希臘欠國基會的一筆貸款，將於週五到期，相關債務談判傾唔掂，希臘就會違約，市場反應難以預料。
不過睇資金嘅流向，投資者似乎已經將注力從歐美市場，回到亞洲，特別係中國市場。據路透紐上週五引述的美銀美林全球研究報告指出，至上週三（5月27日），全球投資者向專注于中國股票的基金投入46億美元，創下2008年4月以來此類基金的最大周度資金流入規模。似乎是中國股市愈升，外國投資者愈有信心。
報告稱，與此同時，美國股票的基金流出39億美元，係過去10周內第九周錄得資金流出。EPFR Global研究主管Cameron Brandt說，一些中國股市基金「創下有史以來最大的周度資金流入規模，因投資者預期中國央行將公佈進一步的刺激措施，扶助經濟實現7%的GDP增長率目標。」
另外，美銀美林報告指出，流入中國股票基金的46億美元之中，上市交易基金(ETF)淨流入63億美元，互惠基金淨流出17億美元。一般認為ETF投資者代表的是機構投資者，包括對沖基金，而互惠基金投資者代表的是散戶。老外機構投資者改為睇好內地股市，香港H股又可以睇高一線。
陸羽仁
回應(1) 我想回應
陸羽仁 BLOG 舊文