金手指 - 孫柏文 2015年6月2日
金手指：如何結束東江水
■香港買東江水，係收天價，貴過深圳十倍。 資料圖片
周末孫柏文睇股榮兄嘅文，講東江水。大家都知收我哋天價，貴過深圳十倍。大家最頂唔順係佢哋班友嘅態度。唔係被叫「感恩」，就打風時啲機場旅客一冇免費酒店就會向我哋話：「沒中央政府照顧，香港完了。水也沒得喝！」
天然資源都要靠大陸
我buy佢哋話我哋買佢哋嘅水係麻煩到佢哋，真丟架！故我強烈要求香港要全面投資落鹹水化淡，令我哋再唔係偉大祖國人民嘅負累。但唔好諗住搞全面鹹水化淡，就唔會俾人指住鼻哥叫「感恩」。因除經費及利息外，鹹水化淡最大成本就係能源。用osmosis科技即係用電。而政府叫大家考慮大陸輸電來港，咁民意一諗到又會被叫「感恩」，就反彈。咁你話香港發電，香港鹹水化淡咪搞掂？咁就錯曬。因政府逼電廠減排汙，咁相信你我他都反對喺香港起核電，就算發明到唔係搵太陽、風能，當冇風同太陽時都一撻即著嘅後備發電機組，故就要天然氣（全球最出錢收買政客，養環保膠推太陽、風能，特別喺歐洲，就係俄羅斯嘅Gazprom）。
咁啲天然氣喺邊嚟？咪又係大陸！就算在港發電、鹹水化淡，到打風都一樣聽到「沒中央政府照顧，香港完了。天然氣也無得用！」當大家都有啲「城邦派」DNA，都要支持香港全球採購天然氣，喺香港境內起液體天然氣輸入站。
因科技進步，天然氣儲存可離岸用船，政府現電力諮詢，為唔好再令香港成偉大祖國嘅負累，黃錦星局長，做啦！政府唔阻住，港燈（2638）、中電（002）、煤氣（0003）一定可以為國家出力，水、電、氣都結束香港人負累祖國之恥！當你有液體天然氣輸入站同鹹水化淡設施，就算唔用，有把刀，買水、買氣講價都可以大聲啲。唔信？你睇嚇新加坡就知。但啲愛國政客，加埋啲白癡民主派議員，要減利益保證計劃嘅回報。要做到呢啲資本投資，大家求神拜彿永遠都係低息、低通脹，如果唔係大家就繼續「感恩」啦！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文