金融High Tea 2015年6月2日
外資拖港股後腿
2015年06月02日
美股上周五受加息陰影籠罩低收，搞到港股開市前氣氛都幾差吓，結果恒指低開，之後掉番轉頭向上，真係有啲估佢唔到，主要受內地股市上升帶動。
自從四月北水湧落嚟炒一轉之後，港股市場焦點轉咗去內地，對美息關注少咗，不過，呢排美國加息之說愈
來愈響亮，雖然六月份聯儲局調整息口機會唔大，但九月份加息機會唔細，美國利率掉頭，搞到美元上升，對外圍股市都有啲心理影響。
我話雖然北水對港股影響增加，但唔能夠話完全當美息走勢無料到，其中一樣係會左右外資的部署。第二季外資基本上係睇淡港股，北水湧入佢哋順手沽貨，後來見資金源源流入，但佢哋始終唔太肯退讓，若然美息向上，資金會唔會撤離股市，令佢哋進一步拋售港股，搞到香港國企同A股差距再擴大呢？雖然我係好友，但見到近期港股的弱勢，呢一着不可不防。
好似昨日匯豐中國五月製造業採購經理人指數(PMI)終值回升至49.2，官方五月份製造業採購經理指數(PMI)回升至50.2，創六個月新高，帶動滬深股市持續向好，上證指數全日飆逾4%，相比之下港股又係跟唔上，所以雖然話港股能夠向上造好，大型股份買貨氣氛只係一般。
新股食胡舖舖清
內地股市就唔同，滬深兩市高開後，昨日係威係勢，愈升愈有，上證指數收報4828點，升216點；深成指收報16917點，升817點。創業板指數收報3718點，升175點，再創歷史收市新高。兩市今日成交額達1.81萬億元人民幣。港股受內地帶動，一度轉跌為升，倒飆342點，高見27766點，但尾市升幅減半，受制於27600關收市。恒生指數收造27597點，升172點；國企指數收報14299點，升195點，成交金額1648億元。期指在現貨收市後再下滑，夜期亦軟，到昨晚8點左右，夜期27211點，低水386點。港股唔想跟內地升的趨勢明顯。
中電投與國家核電合併重組，電力股全線飆升，香港的核電股表現都唔錯，龍頭股中廣核(1816) 升上高位，收報5.1元，創咗掛牌新高。除了炒重組外，內地三大核電龍頭的中核準備上A股，相信都係令整個核電板塊炒作的原因。
市場昨日有兩個焦點，大股係首日掛牌的華泰證券(6886) ，收造26元，比招股價24.8元，高1.2元或4.8%，未計手續費及佣金，每手賺240元，升幅比預期升30%細好多，亦無之前隻證券股廣發證券(1776) 表現咁好。喺咁情況下，內地證券股逆市下跌，海通證券(6837) 下滑0.45元，報24.15元，跑輸一眾國企指數成份股；廣發挫0.8元，造25.5元。
華泰證券集資額大，加上好多人孖展認購，呢類捧場客十個有九個會快手沽貨食胡舖舖清，華泰升唔夠半成，正好係呢啲大飛客平手離場的水平，相信隻股點都要喺呢個位消化一輪先。
瑞東一鳴驚人無得恨
華泰雷聲大、雨點小，瑞東集團(376) 獲馬雲有份的雲鋒金融控股共五名投資者入股，復牌後全日爆升13.65元或1.52倍，收22.65元，就可以話一鳴驚人；連帶阿里系的阿里影業(1060) 亦揚0.29元，收報3.62元，有炒友話佢?家只係開始，有貨者不妨坐定定。通常呢類概念股，信則有、不信則無，要睇有幾多人肯跟，所以唔可以睇死佢話佢唔得，尤其係大升市之時；當然更加唔敢話佢實得，皆因股市乃少數人贏多數人錢的地方。
總之，好似華泰咁十個申請九個賺，能夠飲餐茶都應該滿足；好似瑞東升到你唔信，但及時上到車者恐怕無幾多個，至於爆升後跟唔跟，咁就係膽博膽啦。
陸羽仁
金融High Tea 舊文