一周三件：百仕達超抵買
■鄧銳民任主席的百仕達控股，昨日股價反彈近24%。 資料圖片
港股前日（周三）插到甩轆，百仕達控股（1168）現價，係要插到仲要低過每股淨現金，cash is king底下，百仕達係殘上加殘！百仕達由5月尾高位1.71元，一插到本周三0.59元，返番去三年底，
就算以現價（0.88元）計，都跌咗近50%，以集團上年尾揸淨現金35億元計，係高過總市值31億元，兼高過姊妹系威華達（622）淨現金11.6億元！
大股東人脈廣
噚日大奇蹟日，威華達急彈近72%，淨現金比率跌到得30%，百仕達彈咗近24%咁大把，喺唔計入任何資產底下，以每股0.88元買入百仕達，等於hold住每股0.98元淨現金！再講，百仕達主要資產，係總值過20億元投資物業，實淨到痹，NAV2.14元，得0.42倍PB，姊妹系威華達PB，已經收窄到得0.9倍，百仕達PB平咗一截。
仲要咁睇，姊妹系威華達，上年尾淨現金縮減咗，而金融資產就大增1倍，威華達點樣運用豐厚銀彈去搵真銀，應該已經搵到出路。至於百仕達，喺出售紅樹西岸後，近幾年，無超級大project喺手，勁厚現金優勢底下，係要謀求出路。
又百仕達大股東歐亞平（揸45%），出任三馬（馬雲、馬化騰、馬明哲）成立眾安保險嘅掌舵。亦有報載市場人士分析話，停緊牌嘅馬斯葛（136）引入恒大（3333）同騰訊（700），有機會為歐亞平做紅娘。歐生本身係實力大孖沙同時，又同其他祖國大孖沙關係密切。
諗到嘅係，百仕達有超級現金牛優勢，一係就好似威華達咁，進行業務壯大，再唔係，以大股東地位，百仕達絕對有條件做靚殼。咪扯咁遠，短打百仕達，當追番威華達噚日升幅，現價講緊要升36%到1.22元，到時，集團先得0.57倍PB，仲未追到威華達嘅PB水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文