金融High Tea 2015年7月10日
公安部對索羅斯
2015年07月10日
中央救市唔停手，之前都話阿爺出聲唔出錢嘅救法唔掂啦，果然阿爺都見到勢色不對，前晚都知就快爆大鑊，開始變招，既出真銀又出槍。之前救市係叫經紀夾錢「揼雞」1200億來入市，變招後唔聲唔聲加碼，由中證金公司自己出2000億人仔，向五大基
金公司買自主性基金，叫佢哋入市買貨，任佢哋買大股細股，實行掟真錢托市。
出銀之外，公安部副部長孟慶豐去咗中國證監會，相信佢唔止會去證監會，銀行同其他金融機構都會去，主要係追查「惡意沽空」。喺出銀又出槍下，個市即刻穩定下來，斷估都係沽空收斂咗。
亂市買股 留意控險
內地未出銀彈加槍維穩前，港股喺周三俾內地累到曾勁插逾2138點，當時真係有種金融風暴前夕的味道。通訊社有報道話，當年狙擊過港股的索羅斯，都到了香港。照咁睇，現時阿爺托市初步頂住，大家唔可以咁快當無事，如果中央最後頂得住個局，索羅斯咪到此一遊，坐一陣就走囉，若然阿爺倒瀉籮蟹，A股彈完再散，索羅斯唔插港股至奇。
有基金界人士講，98年索羅斯狙擊港股，食得太盡，被政府入市夾番轉頭，呢次若然佢再來，唔會再咁笨慢慢玩，多數會打閃電戰，喺兩萬三、四點出手，快插到萬七、八點就走人，政府想出手之前佢就已經食胡離場，等你想救都已經太遲。今次出咗個「公安部對索羅斯」的局面，希望公安部鎮得住啦。
所以，大家見到個市定番就當無事，要保持控制風險的意識，依家買股要食得鹹魚抵得渴，始終阿爺救市有一定風險。睇番市況，現在的確有局勢慢慢穩定下來的跡象，有風波慢慢過去的可能性，未來兩日會好關鍵，始終風險控制係好重要，要確保自己有承受能力，喺跌市可以忍得痛先好出手，否則就無謂勉強。
出閘脫腳 大力補飛
講起救市，陸羽仁同內地朋友講起阿爺出手，大家怨聲四起，話管理層雞手鴨腳，搞到倒瀉籮蟹。有說法股市最初大跌，中央部委各有各意見，有人梗係想救市，有人就傾向用西方個套，盡量不干預市場。由於唔係咁有統籌，出閘就有啲脫腳。
阿爺應唔應該用有形之手干預，陸羽仁無意見，關鍵係決定咗干預，講得出就要做得到，否則就無下次。咁唔單止影響股市，仲會影響埋管治。中央依家下咗命令救市，如果做唔到，影響相信會好廣泛。中央想頂住個市，以國家力量應該做得到，問題係付出代價有幾大，同埋後遺症有幾多。內地產業要升級，發展金融係必經之路，交吓學費在所難免，只係希望盡量減低代價，作為投資者，既要睇政策，同時都要自己睇路。
A股昨日一度上飆，一度推動港股昨日曾升1179點，高見24695點，最後升876點收市，恒指收造24392點；國企指數收報11446點，升339點，成交達2121億元。前日曾穿跌兩百元大關的港交所(388) 急彈，收造223.6元，升30.2元，為升幅最大藍籌，好多莊家股仔反彈幾成甚至倍翻，但同高位比仍然唔見一大截。
大隻少少如阿里影業(1060) 大升38%，收2.34元，中航科工(2357) 升33%，收6元，金山軟件(3888) 升29%。呢啲股少少哋都兩三百億市值，都升成咁，其實只反映過去幾日跌得幾慘，過去是洗倉式下跌，好似中航科工咁，周三低位3.9元，根本唔止係升市前的低位，而係一年新低，在恐慌性拋售下，要錢唔要貨，呢件事教訓我們，股票升同跌，都係無乜譜㗎。
陸羽仁
金融High Tea 舊文