異動空間：炒股最關鍵數字
各位見文之時，魏力的北海道薰衣草之旅已經開始，本周都畀唔到貼士，click入本文純粹拎個冧巴食快餐的朋友，大可直接跳去下篇覓食，毋須聽我繼續吹水。如你選擇睇落去，多謝支持，呢五日魏力將會講五件事，明白咗隨時令你炒股思維及功力大進。
第一件事：市況良好時，魏力
都會盡力搵股畀各位，市唔好就唔搵？梗係啦，市差仲夾硬炒係逆天而行，曹Sir教落有智慧不如趁勢嘛！冧巴雙手奉上，仲貼去fb方便各位睇，但無論文章有冇寫目標價，下面總有留言問，目標幾多？可見目標價幾咁重要！不少人眼中，炒股不外乎兩個字，一買一賣。你推我買，到價食糊，資本主義最高深的玩意，是否如此簡單？如要為目標價下個定義，魏力認為係根據當時市況，判斷某股票未來可體現的合理價。眾所周知，市況日日轉，5月同家陣睇上海電氣（2727），氣氛都差天共地啦！5月買咗中伏，又無執行15%止蝕，7月先問我係咪仲睇15蚊？你叫我如何告訴你這殘酷的現實呢？炒股要經常緊貼市況，唔對路要即閃，而目標價係會日日轉。點先知氣氛逆轉？睇住本欄咪知囉。
魏力
http://www.facebook.com/2012jason
魏力
異動空間 - 魏力 舊文