魚樂無窮：暴風雨過後入市攻略
■A股出動公安查惡意沽空，滬綜指輕易重返月初水平。 資料圖片
A股出動公安查惡意沽空，性命攸關下，人人自危只買不沽，逾半公司停牌，滬綜指輕易重返月初水平，港股瞬間收復上周三失地，部份超賣中資股及細價股更升凸，如果咁啱外遊冇睇市，肯定感受唔到過去幾日戰友來
回地獄折返人間嘅滋味。
向前看，究竟中港股市係咪見底？睇A股，阿爺櫳底招數都出曬，最新係叫公司管理層全家總動員增持，實行全民救市，盛傳3400點金融危機底線暫時守住；滬深孖展額度分別於上周五及周四止跌回升，但救市行動不絕，意味1.4萬億孖展額為可接受水平。場外配資又如何？據聞一比五、一比四嘅超高槓桿已經玩完，餘下一比三、一比二等中型槓桿有待解決。最大不明朗因素，要數正在停牌嘅逾千間公司，唔少散戶及基金資金因此被鎖實，如果係早幾日復牌，肯定被沽體無完膚，但而家市場氣氛轉好，加上在增持令下，相信同樣頂得住。現實啲講，復得牌應該傾掂曬數啦，係咪？
港股呢？整個遊戲一直擔當被動角色，一切只看A股，但食得鹹魚抵得渴，有大時代自然要幫手找數。講到入市，短線重回上落市格局，搵績優股埋手較易計數，復星國際（656）預計中期盈利增長五成，市盈率有望重回單位數，大股東過去幾日於13至15元撈底，可視為底位，候回吐至16元吸納，已經有一定防震力。
唐牛
https://www.facebook.com/tongcow88
唐牛
魚樂無窮 - 唐牛 舊文