陸羽仁 BLOG 2015年7月7日
限期指沽空
2015/07/07 09:36:08
網誌分類: 經濟
希臘公投，有61%選民拒絕國際債權人的紓困方案，令到希臘脫歐機會大增，但歐洲股市相對冷靜，整體下跌2.2%，其中德國股市跌1.5%，法國跌2%。美股早段跌得比較多，杜指開市跌近150點，但午後跌幅反覆收窄，收市只係小跌47
點。希臘出事美國跌0.3%，香港跌3.2%，本地係因為大陸跌，唔係因為希臘，唔好搞錯。
睇番美國股票恐懼指標VIX指數收17，只係上升1.3%，反映投資者對於希臘危機，其實唔係好驚，或者已經預咗。最受事件影響的金融板塊，只係下跌0.4%，美股昨日下跌，好大原因係受到油價下跌近8%至每桶52.77美元，能源板塊下跌1.3%所累。
歐盟領導今日就希臘問題召開臨時高峰會。美國證券界以至分析員對希臘危機普遍比較樂觀。Wunderlich Securities首席市場策略師Art Hogan，股市呢輪跌市，主要原因係德國對希臘的態度比較強硬，情況或許會更差，關鍵還是事態將會如何發展，不過，佢認為在未來48小時內，會有好消息出現。據路透社報導，德國總理默克爾與法國總統奧朗德表示尊重希臘公投結果，又重申談判大門仍然開啟。
皇帝唔急太監急，港股反應大過歐美，在阿爺重鎚救市情況下，A股終於迎來反彈，上升2.4%，港股仍然頂唔住，跌到扒街，人心虛怯。內地股市反彈，主要和阿爺護盤軍力托內地兩桶油（中國石油同中石化）有關。單係中國石油，昨日就掃貨超過230萬手，涉資近30億元，中國石油A股昨日大漲10%；中國石化A股漲9%。不過，H股仍然唔得，分別跌1.8%及1.3%。內地巨豐投顧認為，投資者已經鬆咗一口氣，此前內地股市「救市前每天跌10%，救市後跌20%」呢一輪阿爺救市，終於有番反應。
上周六內地21家券商聯合公告，出資不低於1200億元入市，原來這些資金並非由券商直接投入市場，而是需要在昨日上午11點前全部打入中國證券金融公司帳戶，由證金公司統一進行投資，昨日證金公司首批建倉標的包括中國石油、中國遠洋、北京城建、中國鋁業、華電國際等30只股票，耗資近57.3億元，且標的均集中在上海交易所。所用額度僅佔1200億元的4.8%，換言之後續還有大把子彈去打。
昨日證金公司買入最多的是中國石油，共斥資27.82億元，占比超其全日總成交額的35%，這就是中國石油昨日漲停的直接原因。
不過要留意阿爺係救大唔救細，救上海大指數不救深圳，所以中小盤股仍然重創，禍及香港。阿爺認定有人力沽上證500指數的期貨合約，所以昨夜又再出招，中國金融期貨交易所(中金所)昨晚發出《關於進一步加強股指期貨交易監管的通知》，自7月7日起，對中證500指數期貨客戶日內單方向開倉交易量限制為1200手。即係話任何人都不可以單日開1200張以上的淡倉或者好倉。
另外中金所又話，將進一步加強股指期貨套期保值交易管理(即對沖交易)，重點加強對期現貨資產匹配的核查(即沽空要和實貨持倉匹配)。對於違規行為，將採取限制開倉等監管措施；對於涉嫌違法行為，將報送中國證監會行政調查。
中金所限中證500期指開倉沽空規模，又講明對所有開淡倉做對沖的倉位都會查查是否有現貨配，是要擠壓沽期指壓股市的力量。這一輪下跌主要由中證500指數帶動，該指數覆蓋上海深圳兩市500家中小市值公司，單個公司市值小。在本次暴跌中，中證500股指期貨明顯比上證50股指期貨跌幅更大。
內地市場人士指，過去一年來細股和創業板股急升，這些中小盤股持股集中度相當高，由莊家操控，但這些股份接盤量少，很難出貨，莊家為了迴避大盤下跌，通過期貨上沽空對沖風險，於是形成「買股票、賣期貨」的現象，細股跌市時他們一邊買自己操盤的股票一邊沽中證500期指，令大市跌勢加劇。但中金所一出招，這些沽空股不會達到匹配要求，況且做莊也不能申報持股，等如莊家不再可以這樣對沖。這樣可以減少股指期貨的跌勢。
估計未來內地大市可以逐步穩定下來，不過突然爆此大災，災後休養都有排，大家不要過份積極入市博長線，短炒要睇價位出入，有糊要食，兼要定好止蝕，強硬執行。
陸羽仁
回應(10) 我想回應
陸羽仁 BLOG 舊文