金融High Tea 2015年7月7日

金融High Tea 2015年7月7日
內升外插 外資搵食
2015年07月07日
　　中央暴力救市，同沽空大熊砌過，喺連出超過十招組合拳之下，內地上證綜指似模似樣高開近8%，不過香港無人救市，淡友大幅推低港股，搞到恒生指數一度跌咗1300點，內地A股都頂唔住，升勢慢慢收窄，最後上證仲升2.4%，香港就跌827點收市，跌3.2%。

　　傳江浙溫州幫造淡
　　唔夠半個月，港股已經兩度插咗成千點，而且在大跌日成交每每爆上逾2000億元，可見沽售壓力唔細。中央出重招救市，不過有啲雞手鴨腳，除了財政措施，加埋嚴查惡意沽空，差唔多講明做淡友要聽拉，查來查去未見有明確消息。

　　內地原先質疑係外資大鱷做淡，查咗一輪搵唔到證據，估計外資最多係出吓口術，高位沽啲貨，係幫兇唔係元兇，於是內地有消息話，呢類沽得最狠嘅係溫州幫同江浙幫，呢兩批人一向喺投資市場活躍，市升市跌都會出嚟搵食。

　　睇番內地今次牛熊鬥法，中央最後唯有出暴力救市，在上周六敲定的招數都相當齊全，所以A股昨日開市可以爆上，但內地沽壓唔細，慢慢沽番落嚟。另外希臘公投結果出咗嚟，反對國際債權人方案佔多數，希債前景不明，就畀淡友用作勁沽港股的理由，結果恒指不斷大插，仲有拖低埋內地股市嘅作用。

　　阿爺硬招無預香港
　　希債究竟有乜大不了，搞到中港股市大跌，呢個真係一個問題！因為睇番喺亞洲時段美國杜指期貨，只係回落百零點，幅度都係一個百分點，遠低於港股跌幅近三個百分點，其他如日股也只是跌2%，遠無香港跌咁多，恒指最多插5%，真係好誇張，所以呢鋪淡友借希債開刀的味道幾濃。

　　阿爺救市雷霆萬鈞，但措施不涉及香港，北京對港股有點鞭長莫及，喺恒指大力下插期間，滬深股市開始扭轉原來的升勢，喺香港上午交易時段，歐洲基金都未瞓醒，點會突然有大量沽盤湧出嚟呢？會唔會有內資空倉多頭進襲，散佈負面氣氛，用嚟沖淡阿爺救市的力度呢？歐洲開市都係跌咗一、兩個百分點，咁希債危機又點值港股跌5%先？

　　睇番阿爺救市，雖然有啲論論盡盡，打開口牌要開硬功，實際操作起嚟，見到護盤行動係開市初段最明顯，好快就將大市升幅推到去一成過外，之後開始放手，等佢自由飛行，結果個市飛兩飛開始滑落，於是臨收市阿爺掃番啲大股，指數推番高收市。

　　中央硬招救市首日雖然唔係好靚仔有型，但總算成功終止了大盤低收局面，心理上守住了跌勢，如果未來兩日個市可以喺接近水平穩住，應該就渡過咗最兇猛的拋售潮。

　　喺內地股市危插下，港股跌得仲傷，大股好多插到飛起，細價股已經直情爆災，好多股仔單日急跌三、四成，估計好多炒家可能要班水返內地救駕，急急喺香港沽貨，大量股份昨日創出五十二周新低，即係話一年來的升幅全部泡湯。唔少股仔收市跌一成幾，但屠殺式沽售最急勁時，跌三、四成者比比皆是，散戶跟風如果持倉太重，十之八九都過唔到呢輪沽浪。

　　睇番恒生指數正式起步係大約24300點，當時外資唔睇好，但個市一直升，最高去到28588點先插番落嚟，昨日最低見24750點，幾乎原地踏步。

　　恒生指數收造25236點，跌827點；國企指數收報12231點，跌377點，成交增至2127億元。單是騰訊(700) 已質低恒指144點，全日收造146.5元，挫5.5%，高盛削港交所(388) 目標價至220元，股價最低見過223元，瀉14%，收造235元，挫9.6%，是表現最差藍籌，睇淡外資應該又搵到食啦。

　　陸羽仁
金融High Tea 舊文