女神tea time：
港股是最孤獨的
■港股噚日傷亡慘重，曾經失守牛熊線。 許頌明攝
港股係孤獨嘅，明明大媽借孖展炒A股炒到爆煲，但A股有阿爺照，噚日頂多只係半死；希臘冇錢就係任性，舉國歡騰賴皮唔還錢，至截稿時，歐洲股市唔算跌得多。不過，港股噚日真係傷亡慘重，仲曾經失
守牛熊線，唔講真係以為大媽找唔到孖展數，希臘唔還錢，統統由香港股市埋單。
今次阿爺救市招數可以話係毫無章法、藥石亂投。而家個問題係，大媽場外槓桿拆唔掂，華泰證券最新報告指，中國股市場內場外融資的總體規模預計在3.3萬億元（人民幣．下同）左右，悲觀情況下可能為3.5萬億至3.7萬億元，阿爺話掟1.7萬億元出來，根本唔夠冚。
A股炒起背後邏輯係唔理基本因素，只炒政策市，阿爺先係大莊家。投資A股係因為信阿爺有無限嘅錢去包底。不過今次阿爺破釜沉舟式亂出招，就已經將佢對治理股市能力露曬底。
好彩嘅係，A股危機下，相信港股A股化進程會拖慢。未來外資都唔會想大力參與A股市場，咁一來港股就好自然受惠。所以相信震盪完成後，與內地相關度較低嘅股份，會有力上番合理水平。好似友邦（1299）以香港、外圍為基地，業績穩健，昨日大跌市仍守得住100日線，49蚊左右都有支持，值得收集。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文