魚樂無窮：比股災更可怕的事
■美聯最新收報3.41元。 資料圖片
舊年12月，唐牛寫過一篇題為《買美聯好過盲搶劏房》嘅文章，8個月過去，來一個中期結算︰劏房價越升越有，舊年大埔嵐山經典177呎單位，入場費兩球唔使，最新黃大仙鑽嶺呎價1.5萬、西灣河柏匯呎價2.1萬，一個200呎單位，
上車講緊三至四球。美聯（1200）股價呢？見報日收3.95元，最新報3.41元，累積跌幅14%，跟住做輸曬，預測九成失敗！唐牛一向為樓市大好友，一來覺得剛性需求大，就算加息推低樓價，肯定夠曬承接力，二來儲局摸著石頭過河，加息似一次性多於周期，難有作為。舊年首度轉軚，皆因見到新居屋同辣招盤開始出籠，加上私樓落成量回復正常，供求關係轉趨平衡下，樓價必有調整壓力。今日review，重申樓價必跌，信心較當日更強。
何解？因為兩個現象︰一、劏房樓盤越出越多，大家卻越搶越興奮，情況猶如細價股，冇基本因素支持炒到過百億甚至上千億，後果如何，大家心照。二、放假行銅鑼灣、尖沙嘴等傳統量區，行人明顯少咗，多咗嘅只有吉舖，經濟活動放慢，住宅及商舖租金肯定下跌，拖低樓價只係時間問題。第二季經濟增長勝預期？可能係黑暗前嘅黃昏。
唔敢學老行尊講三個月細價樓必爆煲，但而家仲衝去買劏房嘅，有定心理準備做蟹吧。
唐牛
https://www.facebook.com/tongcow88
唐牛
魚樂無窮 - 唐牛 舊文