中環在線：為宣傳防乳癌
霍建寧妻唔怕曬
■霍何綺華（右）同區敏霞為宣揚防乳癌，不惜暴曬。 袁志中攝
中秋節都過咗，香港依然熱辣辣，噚日中午氣溫有成攝氏31℃，咁猛熱頭，難得長和（001）大班霍建寧嘅太太霍何綺華（Eliza）願意企喺中環摩天輪附近嘅空地暴曬，曬住宣揚防乳癌意識，實在
佩服。
■霍建寧 霍太出生於50年代，大約喺12年前患過乳癌，病癒之後積極宣揚防乳癌訊息，2007年加入香港乳癌基金會，現任主席。佢噚日就代表基金會，出席美國化妝品牌ESTĒE LAUDER嘅「關注乳癌運動」啟動儀式。
■中環碼頭附近嘅摩天輪晚上會發出粉紅之光。 中環摩天輪發出粉紅之光
大會以粉紅色做主題，霍太特登襯番條粉紅色絲巾，襯到絕！雖然天口好㷫，不過曾經係過來人嘅霍太依然臉不改容，落力宣揚預防乳癌意識。佢指，20年前，每22名女士當中，有1人確診患有乳癌，家陣每17名女士就有1人確診，再三提醒女士要及早做檢查及求醫。
霍太從ESTĒE LAUDER香港董事總經理區敏霞手上接過80萬元支票，話𠵱家好難籌到咁大筆錢。
不過，華華實在唔明白，大熱天時，點解大會要喺中環空地搭個類似溫室嘅「玻璃帳篷」舉行今次活動呢？
原來ESTĒE LAUDER租咗中環碼頭附近嘅摩天輪做宣傳，日頭可以見到摩天輪每個車卡都貼有大大條粉紅絲帶，夜晚摩天輪就會亮起粉紅燈光，黑夜裏見到粉紅之光，希望喚起全球對乳房健康及早檢查嘅關注。
【霍何綺華簡歷】
‧香港大學畢業
‧在會計師樓工作認識霍建寧
‧育有3女1子
‧2007年加入香港乳癌基金理事會，現任主席
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文