金融High Tea 2015年9月9日
挾入口阻逃匯
2015年09月09日
前日內地公佈外儲急跌逾939億美元，人民幣離岸價再挫，但對中港股市無影響。港股上午跟大陸弱弱哋，下午中港兩地都急彈，港股一度爆升逾800點，尾市略回，恒生指數收報21259點，急彈675點；國企指數收報9479點，升376點，成交增至827億元，國
指升4.1%，強過內地升2.9%，算是個靚仔兼似樣嘅反彈。
講起外儲急跌，昨日中國公佈出入口數字都有啲古怪，內地8月出口按年再跌6.1%，進口更勁減14.6%，市場分析是中國經濟下行壓力大，不過進出口跌幅應該比較接近，一般解釋係石油及商品跌價，搞到入口急跌，但我有另一個解讀。
大玩反彈 夾死淡倉
人民幣貶值後，熟知內地情況人士有個說法，話要留意進口數字，如果進入口數字不尋常上升，很可能有人報大入口數字，假借要將人民幣換成外匯找入口數，其實將錢搬離中國。不過呢啲蠱惑招阿爺可能有得出賣，上月入口數急跌14.6%咁多，不排除阿爺係大力嚴查入口，收緊水份，唔俾人借入口換匯調資走人，藉此阻止外匯儲備回落之勢，即係挾住唔俾資金輕易逃離中國。咁樣會有利貿易順差，搞到8月出番3500億美元貿易順差，已經叫做大大幫補外匯儲備數字，否則8月外儲唔止跌939億美元咁少。
昨日早上中國公佈出口下跌時，內地股市都插過2%，但下午中港兩地股市都彈，我覺得都係似跌得太多出現的技術反彈，一舉把淡友夾死。現時市場心態太淡，要沽貨的散戶走得七七八八，短期要再隊落去空間有限，不如玩吓反彈啦。若然急升600幾點淡倉都未死，不排除再會向上挾得高啲，所以跟沽亦有跟沽的風險。
但講到基本因素，內地放緩確令商品交易興旺不再。摩根大通將退出港交所(388) 倫敦金屬交易所(LME)場內交易，市場擔心該行的退出對LME的公開場內交易前景造成隱憂。但港交所昨日有理無理跟大市反番4.6%，去番183.2元。
長建電能合併有睇頭
商品乏力，衝擊相信仍未見底。好似商品交易商嘉能可(805) 早前停牌後宣佈集資同削債大計，目標於2016年底前將淨債務削減至200億美元數字的低位。嘉能可成班大股東都係超級炒手，佢在2011年上市，當時大家已經話大鱷上市套現，係市場見頂徵兆，結果不幸言中。嘉能可上市後股價破底，一直未好過，小股東若然死坐，變成浪比浪低，根本無逃生機會。依家佢股價係15元浮沉，同上市時接近70元高價比無咗七成半市值，前景暫時似乎仲係唔樂觀囉。
藍籌股最搶眼當然係電能(0006) 同長江基建(1038) 合併，長建仲會大派5元股息。呢個月瑞銀曾發表報告指，長建及電能合併可能性高，相信合併後企業會獲注入資產，持有較大的現金儲備用以併購。報告仲引述管理層指引表示，部署於明年動用電能的現金，市場預期有派發特別息的機會。該行估計合併後仍可釋放約10%潛在價值，將長建目標價調高至71元，結果俾佢一棍扑中。長建昨升1.8%，收66.15元。
手機股酷派(02369) 昨早突然停牌，後來知道當中涉及與奇虎360合資公司的股權爭議，奇虎360要求行使認沽權，要求酷派以高價117億港元由奇虎360手中，收購雙方合營的奇酷的49.5%股份。
以酷派停牌前報價計市值為62億港元，突然遇到呢個要求，高層反應都幾激。酷派副主席蔣超即發微博宣言，指「如果你已經沒有任何的愛，你只是個充滿仇恨的畜生，那就只有讓你萬世在畜生道裏輪迴吧」，咁狀況只能講相嗌唔好口。
生產手機的酷派近一年動作多多，包括原大股東以溢價賣股，引入近年風頭甚勁的樂視，期望內容供應商同生產商可以無縫融合，又同奇虎合作。如今和奇虎這單爭拗唔知點收科。
陸羽仁
金融High Tea 舊文