中環在線：金管局阿頭無超然地位
陳德霖被銀行索入息證明
■陳德霖係銀行監管機構金管局嘅阿頭，都要提供入息證明。
金管局總裁陳德霖（Norman）被銀行懷疑佢嘅戶口被人用作洗黑錢，咁大件事？
防被利用洗黑錢
咁大家又唔使咁緊張，事情是這樣的。話說立法會會計界議員梁繼昌噚日朝早同No
rman見面，提到𠵱家國際社會上有一個Politically Exposed Person（PEP）嘅名單，梁繼昌估計，香港官員、政客、立法會議員都榜上有名，佢哋嘅銀行戶口都會獲得銀行「特別照顧」。
Norman當然走唔甩，佢同梁繼昌講，佢喺某間銀行有一個冇用幾年嘅戶口，裏面有些少錢，但係冇提存好耐，有日銀行就打電話畀Norman，要求佢提供入息證明，仲要佢提供財富證明，否則可能要閂咗佢呢個戶口，又話佢個戶口可能被人利用作洗黑錢，幾咁大件事！
咁陳總可以點做？咪就係乖乖哋解畫囉，唔通佢諗住自己係陳總，係銀行監管機構嘅阿頭，就可以有超然地位咩？呢個世界邊有咁多超然嘅嘢吖。而陳總亦都係想講，銀行一視同仁，做得PEP，戶口有唔尋常情況，銀行一樣會出聲。
不過，講開又講，Norman平時見到傳媒就cool魔上身，不苟言笑，估唔到梁議員對佢嘅評價又好正面。原來Norman一年大約有3次同梁繼昌坐底開會傾偈，討論財經界各類熱門話題，而且相當認真，梁繼昌仲讚佢勤力㖭喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文