一周三件：合豐博翻半番
■國家郵政局料今年雙十一，全行快遞運量同比將增40%。 資料圖片
今日雙十一，據估計，呢段期間嘅快遞運量將達到7.6億件！除咗電貿、物流，周邊好似主打包裝瓣數嘅合豐集團（2320），一樣食到應。
持有值錢廠房
國家郵政局最新預測，今年雙十一，全行快遞運量7.6
億件，同比增加40%，而全年全國快遞總量，有望達到200億件。電貿網購熱爆，無人估到快遞數量可以咁驚人。場內合豐，主打瓦楞芯紙、紙板同紙箱產銷，今年上半年，盈利已經增長5倍到1,070萬元，食住下半年火爆電貿熱，主打瓣數keep住有運行，唔計上年出售廠房帶嚟嘅非經營收益，今年全年應該實現增長。
仲吸引係，合豐經上年出售鳳崗合豐紙品廠，廠房價值一反映，NAV彈到上近兩蚊，現價0.65元挨近八年低，得5億元市值、0.3倍PB。場內最近磅嘅行家，深圳上市景興紙業（深：002067），市值折約165億港元，係合豐34倍，講緊4.6倍PB；山鷹紙業（滬：600567）178億港元市值，1.6倍PB。
又今年頭，美國兩大紙業包裝巨頭MeadWestvaco同RockTenn，見網購帶動紙品包裝需求，搞合併壯大，新合併後企業市值達1,060億港元，挨近1倍PB。
合豐PB平絕之餘，仲未計集團出售一間廠房，已獲利3.8億元，幾乎等於成間公司市值。家陣合豐仲有三間廠喺手，分分鐘又係禾稈冚珍珠，PB可能仲抵。
趁雙十一，短打合豐，博翻半番到0.95元計數，PB先得0.47倍，比上邊行家PB，仲係離行離列，又相對合豐上市以嚟平均0.89倍PB，亦係差咗一大截！
錢雋
細價股專家
本欄逢周一、三、五刊出
錢雋
一周三件 - 錢雋 舊文