金融High Tea 2015年11月11日
強美元 要小心
2015年11月11日
美國十二月加息之聲漸響，港股開始感受到銀根收緊的威力，特別係地產股，再加上董伯伯主催的智囊機構香港團結基金拋出賣公屋方案，被人形容為「八萬五」重臨，令地產股明顯下插。由於地產股佔恒指成份股比重仲係唔輕，所以港股開市無耐就碌低，香港人大部份財富都放喺房地產，若然樓價低迷，造成
的負財富影響唔可以小覷。
要對加息增大戒心
陸羽仁對美國加息存有很大戒心，雖然很多人說聯儲局很難連續加息，甚至可能只會加息一次，我覺得當中存有很大的不確定性。所以，在12月美國加息以後，股市炒高，對明年股市，要保持一定戒心。
我早前出了本書《順勢逆勢》，當中詳細分析香港幾次由牛轉熊的大勢，其實都與美元轉強有關係。美國改變利息策略，令美元轉強，資金持續流出亞洲，回流美國，掏空區內股市的子彈，股市由牛轉熊。所以，美國果真加息，要十分小心這個大趨勢又會重演。
不妨補充多兩句嘅係，上周五美國公佈意外強勁的非農報告後，美元加息機會轉濃，匯價重新上觸今年3月創下的高點。大行高盛就預測，美元將再次爆發，在年底前即可追平歐羅，甚至比歐羅更「貴」。雖然喺大行中，高盛嘅睇法係大行中屬少數，但如果美元轉強，必然令香港資產同服務相對變得昂貴，樓市難免添壓。
市場家好多大行，對美元唔係咁睇好啫，主要係覺得美聯儲局加息已經被市場定價。第二，如果知道美聯儲局將要加息，歐洲央行可能就不會在12月擴大寬鬆了。高盛首席外匯策略師Robin Brooks就唱反調，認為美歐貨幣政府關連性唔係咁強。
他舉例，聯儲局去年秋季開始姿態轉向鷹派，歐洲央行仍在去年9月意外降息。聯儲局今年3月重新轉向鴿派，歐洲央行反而偏向向鷹派的立場，到了10月份才再次轉向鴿派立場。短期而言，兩大央行似乎都只是追求國內目標的實現，而唔係考慮兩大體系間的互動。高盛仲指出，由於歐美貨幣政策的分化，今年以來歐羅已經下跌了11.3%，推高美元近10%，預計歐羅兌美元將在年底跌至平價。
傳統上，強美元對香港經濟同樓價都有壓抑作用，從股民及業主角度，希望今次高盛睇法係錯啦。更重要係，投資唔可以只係講主觀願望，樓市短期會受息壓力易升難跌，地產股本來唔係貴，計資產就大件夾抵食，但講前景就都係要小心啲穩陣啦。
賣公屋引發「八萬五」聯想
至於團結基金響頭炮，建議政府出售公屋，對市民大眾可能係好事，但對發展商就唔一樣。呢招其實唔係新招，過去曾經賣過，後來政府覺得出售公屋單位，唔係個個租戶肯買，賣唔出嘅單位管理同維修費用，好難同出售單位一齊處理，所以無耐叫停咗。家智庫擰番出來煲，雖然係舊瓶新酒，但大家好驚董伯伯當年行行吓不存在嘅「八萬五」會翻生，故此地產股聞聲腳軟。當年董伯伯又賣公屋、又猛起居屋，加埋私人推地，被發展商形容為「八國聯軍」打殘樓市，故此再見熟口熟面的招數，自然有無限聯想。
由於憂慮美國下月將加息同「八萬五」翻生，加上內地公佈數據，令通縮憂慮浮現港股續無運行。恒生指數收市造22401點，挫325點，險守22400關，全日逾千隻股份下挫；國企指數收報10314點，跌191點，成交822億元，藍籌股近乎全軍覆沒，地產股恒基(012) 跌2.7%，九倉(004) ，跌2.2%。相比之下，內地比較強勢，但到尾市都係頂唔順，上證指數連升四日後斷纜，收報3640點，微跌6點。
陸羽仁
金融High Tea 舊文