魚樂無窮：靚殼半價大平賣
■中華國際市值3.7億，主板嚟講絕對係大低水。 資料圖片
奕達（2662）宣佈有意賣盤後，半個月狂升三成，市值膨脹至15億，市賬率接近3倍。你話炒到咁貴點值，我話市場需求大，今日高價明日低價。放在你眼前，有一隻超值細價股，提防機會一閃即逝，講緊嘅係中華國際
（1064）。有幾超值？中華國際市值3.7億，主板嚟講絕對係大低水，比起殼價6億，折讓四成。望望資產，嘩，不得了！每股資產淨值（NAV）高達1.38元，以現價0.62元計，市賬率只得0.55倍，即係1蚊資產6毫子有找就買到，筍！
點解賣得咁平？原來有段古。中華國際主要持有兩項物業，包括重慶港渝廣場，以及廣州越秀區三幅商業地，後者一向由公司旗下香港正大、透過廣州正大持有，不過，一間名為越秀私企嘅公司，自稱擁有廣州正大權益，意圖分一杯羹；2009年7月，越秀區人民法院裁定，越房私企喪失合營企業中合作資格及法律權利，其後越房私企提出上訴，但僅在2009年10月進行一次法院耹訊，之後便無下文。
中華國際講明，對上訴案樂觀，事實上，公司超殘價亦已反映官司因素，一旦成功解決，呢條壓著多年嘅彈弓，有力彈上天咁高。近日有報道指，廣東國資委今季要搵多隻殼，注資資產數以百億計，從地理及業務角度出發，中華國際啱曬條件，大有機會成為今次釋放價值嘅藥引！
唐牛
https://www.facebook.com/tongcow88
唐牛
魚樂無窮 - 唐牛 舊文