陸羽仁 BLOG 2015年11月18日
舊經濟股市
2015/11/18 09:15:42
網誌分類: 經濟
歐洲為抗恐襲，力挺股市，雖然德國收到恐襲威脅，在歐洲央行可能加碼推QE的預期下，德國股市仍然大升2.4%，法國股市更大漲2.8%。
美股杜指中午表現都唔錯，曾經升超過150點，午後反覆回順，接近平手離場，收市只係微升6
點，17495點；標普500指數則倒跌3點，收報2050點。
美股近排主要都係跟住油價走，油價反彈，美股升，油價跌，美股跟跌，紐約油價昨日又跌超過2%，去番每桶40美元邊緣，最新報40.8美元，令到能源股再度回落，拖住大市後腿。杜瓊斯能源指數昨日跌1.2%。
雖然中東因為歐美要打ISIS，局勢變得比較緊張，但由於ISIS控制的石油設施唔多，能透過黑市出口的數量有限，對原油的供應無大影響，所以在供應遠多過需求的情況下，原油價格弱勢基本無變，市場目前的預計紐約原油價格的下一個目標係每桶39.6美元。
另一個令到美股回軟的原因係美國公佈10月CPI較上月增長0.2%，雖然仍然低過市場預期，但也是3個月以來首次上漲，由於扣除咗能源同食品價格的核心CPI增長為1.9%，聯儲局兩大加息指標之一係通脹達到2%，或者聯儲局有信心會回升到2%，所以通脹報告使市場對當局於12月開始加息的預期，再上一層樓。股票恐懼指標VIX指數昨日回升了3%。
對於聯儲局會否於12月加息，有「末日博士」之稱的經濟學家魯賓尼(Nouriel Roubini) 接受CNBC訪問時話，聯儲局喺12月或者明年3月加息，其實都無所謂，只要唔好加得快而急，對大市唔會造成大影響。魯賓尼指出，聯儲局早期話會逐漸地（gradually）加息，依家補充話會非常逐漸地（very gradually）進行。非常逐漸地，意思即係細過微調「the dot plot」啦。魯賓尼預期聯邦利率至2016年底會升至1厘至1.25厘。即係大約加1厘
對於全球未來經濟前景，魯賓尼又表現得唔係咁「末日」喎。佢認為唔會出現全球性經濟衰退，主要原因係中國經濟可以避免硬著陸。上證綜指已經由8月的低點大幅反彈，今年至今仍有11.5%的進賬。美國第三季度經濟雖然唔得，但亦唔會出現衰退，不過，股票的回報唔會好高，預計只有好細的單位數增長。
如今全球股市要捱過12月加息呢一關，睇嚟美股仲好硬，似乎逐步消化加息的影響，港股就腳軟軟咗少少，港股本地那部份以舊經濟為主，利息左右大局，睇嚟都會繼續落後於美股甚至大陸股市。
陸羽仁
回應(3) 我想回應
陸羽仁 BLOG 舊文