一周三件：豐德麗夠抵買
■豐德麗的財務比率健康。圖為集團行政總裁呂兆泉。 資料圖片
麗新發展（488）上周二晚公佈話2供1，豐德麗控股（571）周三當日，股價亦無辜插咗13%，PB得番0.09倍，拍落邊瓣，都係超殘勁抵搞！
財政健康夠穩陣
豐德麗現價0.67元得0.09倍PB，超級
大折讓91%，而集團揸住電影媒體股寰亞傳媒（8075）59.2%，同內房麗豐控股（1125）51%，兩隻股家陣1.42倍同0.15倍PB。豐德麗對上則有麗展，未計呢次供股前嘅PB係0.1倍，終極控股麗新國際（191）0.12倍PB。嶽少麗新系絕大部份股份PB已經夠抵，豐德麗PB超級抵！
場內新鮮熱辣，創業板中國創意（8368）上周三掛牌，上市配售價0.39元，家陣講緊4.79元。呢隻創業板嘅基礎投資者，包括雲鋒基金創辦人虞鋒（另一位係馬雲）。豐德麗下邊寰亞亦有雲鋒基金手影，而豐德麗亦係半隻電影媒體股，市值得8.3億元。上邊中國創意市值57億元，係豐德麗7倍！
又祖國10月百城指數住宅平均價格，環比升0.3%，住宅均價兼連續三個月環比上升，內房回暖，由麗豐到豐德麗，就算唔講升值，資產起碼都實淨，NAV唔會走樣，豐德麗個PB貨真價實。
豐德麗到今年7月尾，現金45億元，連票據嘅總借款65.7億元，得20.7億元淨借款，淨借款比率22.6%咁大把，除非要搞大製作，否則咁健康嘅財務比率，照道理無伸手需要。
豐德麗只係追上內房麗豐0.15倍PB咁大把，已經講緊要升64%到1.1元。又電影媒體PB高到無譜，就算豐德麗去到呢個PB，怕且亦無邊隻媒體股夠佢平。
錢雋
細價股專家
本欄逢周一、三、五刊出
錢雋
一周三件 - 錢雋 舊文