睇淡招行
2015/11/27 08:38:48
網誌分類: 經濟
美國昨日係感恩節，美股休市一天。歐洲股市第二日反彈，德國及法國股市齊升超過1%。高盛睇好歐洲股市，話美國下月加息，歐洲央行可能減息0.1厘，另外將量寛延至2017年，資金短期會流入歐股。
講起高盛，佢昨日出
報告唱淡招行(3968)
，將招行H股評級由「買入」降至「沽售」，對A股評級由「確信買入」降至「中性」評級，主要原因係招行A股及H股，目前估值較同業分別高出47%及15%，認為股價太貴，升勢不可持續。報告指招商局集團由7月以來積極在二手市場增持A股及H股，至11月9月，持股量已經去到29.6%，接近30%的強制全面收購水平，預期大股東未來唔會進一步增持。 高盛對招行今年純利增長預期不變，維持6%，但2016年及2017年的純利增長預測由10%及11%下調至8%及10%。原因係較高信貸成本及不良貸款率上升，抵銷了其淨息差及手續費收入表現。高成下調招行H股目標價3%至20.6元，預測明年市賬率1.08倍，略低此前預期的1.18倍。受到高盛唱淡拖累，招行昨日大跌4.8%，收18.78元，係表現第二差的國企股。估計招行還有較深調整。
瑞銀上日潑港股冷水，話港股明年只有波幅無升幅，明年底恆恆指只會升至22058點，仲衰過依家。不過，基金公司富達國際投資又唔係睇得港股咁死，認為現時港股及中國股市估值非常吸引，投資者可透過中國不同的改革主題，尋找投資機會。
富達亞洲的投資總監Catherine Yeung在倫敦接受訪問時話，中國政府與市場缺乏溝通，結果造成很多誤會，如夏季的暴力救市、8月11日人民幣大幅貶值等，當時外資都以為中國已失控，市場亦大幅震盪，令到投資者對中國持審慎態度。她認為阿爺可以主動與市場溝通，增加市場信心。而富達環球經濟師Anna Stupnytska則指出，若未來數月，中國經濟穩定下來，對市場來說是正面消息，又相信私人消費是明年經濟的推動力。Catherine Yeung認為，很多內地散戶選股時只看名字，不留意公司的基本面，亂要一通，導致部分A股估值升至不合理水準，港股的投資情緒容易受到中國所影響，年初港股沒有跟隨A股上升，但第三季卻跟隨A股大幅調整，所以目前港股相對A股來說可謂異常吸引。
她認為中國消費絕對是未來數年的投資主題，不僅利好中國的消費服務業，也惠及亞洲區內其他國家。另外，很多中資企業在一帶一路的領域更容易找到新項目及新發展機會，投資者可留意相關企業。
外資對港股後向睇法分歧，多少反映不少投資者看淡中國經濟的情緒，所以長線投資者買股唔使急，等股價跌殘啲才買也未遲。短炒就搵外資有興趣的行業去炒，如內地消費行業，贏面會高少少。
陸羽仁
回應(1) 我想回應
陸羽仁 BLOG 舊文