金融High Tea 2015年11月27日
金屬版QE
2015年11月27日
下個月美國可能加息，息魔未上門，歐洲已經驚定先，提早啟動放水措施，令隔晚歐股上升，港股隨之高開，可惜跟住乏力再上，呢個月期指大戶好似早早轉倉，近月尾大市都幾牛皮，似轉戰下月，今個月西線無戰事。
美國隻息魔愈養愈成型，各地央行都要做定抗魔行動。歐洲經濟稍為穩定，驚俾美國加息「
搞喎」，同樣，內地都喺方方面面着手，希望可以撐住個市。內地A股偏軟，市場都係等緊幾時阿爺又會出手救市。
各國央行抗「息魔」
經過第三季A股大跌後，中央已經把經濟維穩放喺轉型升級之上，一方面積極用財稅措施去保底，同時用行政手段去整頓市場，避免市場再出現股災式震盪。外電昨日就引述消息人士，話中國正考慮收儲有色金屬的方案，建議被形容為金屬版的QE，意思係中央放水儲貨，以挽救跌到阿媽都唔認得的金屬價格，穩住經濟，反映阿爺無停手穩住局面的態度。
據報道，中國有色金屬工業協會周一向發改委提議，要求政府買入鋁、鎳，以及鈷、銦等稀有金屬，以消化過剩產量。這是2009年以來第一次聯合行動。
鋅價跌至六年低點之際，呢一輪金屬跌價潮，唔單止整個行業，甚至全球金融同經濟都可能受累。早前商品交易商嘉能可(805) 股價大跌，昨日再跌4%，以至於渣打貸款惡化，都同商品不振有直接關係。
中國面對呢個惡浪，主要鋅冶煉商20日發佈倡議書，計劃減少2016年精鋅產量50萬噸，聯合減產規模接近中國精鋅年產量的10%。
除了鋅，鎳價同樣在近期大跌，有說因為惡意沽空，令央企在鎳上虧損上百億，中國有色金屬工業協會要求監管機構調查。上周金屬價格下跌時，上海期貨交易所未平倉合約大幅增加，幾種金屬的成交量也大增。所以減產和收儲有色金屬的建議，都有針對沽空出招的味道。
阿爺最後如果出招，跌到咁低殘的金屬市場隨時大幅夾上，對商品市場甚至金屬股都有刺激作用。昨日大型金屬股都有反應，中鋁(2600) 升1.2%，江銅(358) 亦升1.2%，似乎有投資者博有金屬版QE出台。
內地等緊阿爺有無招出，雖然市場憧憬歐洲央行下月加碼量寬，恒指曾飆近300點，但最後因為A股無力，恒指要微跌收市，報22488點，下挫9點；國企指數收報10108點，跌19點，成交減至614億元。
11月份就快過去，下個月有可能係息魔臨門的日子，相信中央開始會部署應對，以免個市過份受驚，期內相信出招機會好高，差別只係會唔會搶先喺聯儲局前有所動作，所以如果個市插得多，都有可能會夾番轉頭。
炒電池股一日來回
早前話呢個星期都係搵嘢炒格局，電池股近日升得幾急，昨日出現回吐，最搶眼的天能動力(819) 一下就插咗近8%，收報6.61元，若果周三見升高沽貨，昨日輕鬆買番，呢一轉已經好和味。電池股係新興行業，天能係龍頭公司，有盈利已經好叻。呢類公司股價表現無客觀標準，主要係睇估值，即係市場對佢觀感點樣，情況同天氣一樣，可以變得好快，故此遇着股價好，就不妨先食胡。同類公司好似做電動車的比亞迪(1211) ，又或者呢幾個月新股寵兒IMAX(1970) 都係呢類，一樣係升可以升得好多，跌可以跌好快，捉準概念可以來來回回炒吓短線。
比亞迪遭摩根士丹利劈評級及目標價，股價逆市下挫，成為國企指數表現最差成份股，收造41.55元，挫6%；旗下比亞迪電子(285) 都跌3%，炒慣佢的股民又可以高沽低吸走吓位啦。
陸羽仁
金融High Tea 舊文