笑到最後：
因為少10蚊唔生仔？
五中全會宣佈全面實施二孩政策，明顯係一個影響中國結構嘅大政策，肯定會帶嚟一定的質變，但係上個星期四收市後消息出現，二孩概念股例如中國兒童護理（1259）上周五大升四成至1.05元，大市反而繼續跌，臨收市10分鐘仲要掟得更劇烈，證明過去一個月嘅升幅，已
經一路反映緊美國未加息住、人行減息降準、養老金入市、訪英美成果、二孩政策等等原因。
短期如果沒有更加強大嘅利好消息的話，市場出現食糊潮在所難免，繼續維持上個星期食花生態度。
二孩政策屬中性
至於二孩政策係咪一個利好消息，直線思維當然係中國經濟增長放緩，以往靠人海戰術廉價勞工，到一孩政策面臨人口老化，放寬咪可以解決問題囉！
純粹生理問題，即使全中國人對習總惟命是從，一聽到可以生多個，即刻去造人，生到出嚟都要10個月後，培訓到有工作能力都要等到18歲之後，即係政策改變，要等20年先可能見效，但開支要畀咗先。
一孩政策喺1979年同改革開放同期進行，已經有三十幾年。二孩政策針對嘅一定係20、30歲正值壯年生到仔女嘅人，呢批人就係當年嘅「一孩」。
假設兩個獨生嘅年輕夫婦工作，準備要養將會退休嘅男女方父母，加多一個小朋友，一對壯年夫婦計埋自己工作就要養7個人，會唔會生多個，好睇經濟前景，中國現在似乎畀唔到乜嘢經濟希望大家睇。
另外，原來一孩政策生一個係有補貼，叫做「獨生子女父母光榮證」，各地方唔同，例如北京獨生子女家庭，每月可領取10元人民幣，又有500元人仔一次過獎勵。二孩政策落實後，以上補貼會取消曬。
大家可能會覺得，只係差10蚊，冇理由會造成扭曲。呢種思維明顯係受得歐美人道思想荼毒得太多，唔了解中國真實「國情」。
喺香港，真正「國情」經常發生，由雙非搶閘拎身份證，到申請綜援公屋各項補貼，無一樣唔係為咗少少利益而作重大犧牲，所以你問中國人會唔會為咗10蚊補貼，由原來生一個改為唔生，真係好難答你。
始終中國已經係「強國」，養育小朋友成本唔低，加埋「贏在起跑線心態」，成本更巨大。如果到頭來要有補貼先肯生兩個，結果就會好似電訊商咁，為咗谷客要加強手機補貼，補貼要使錢，又會損害ARPU（每月每戶平均收入），個市冇因為二孩而升，其實又有啲道理喎，高明會視二孩政策中性，冇乜咁大不了。
高明
https://www.facebook.com/bigricetea
本欄逢周一刊出
高明
笑到最後 - 高明 舊文