滙海探戈：儲局年尾嚟料
儲局上周三按兵不動，會後聲明對外圍憂慮減退，講明下次有可能加息，令年底加息行情增加，帶動美元當日應聲抽高。但美國其後出爐的數據麻麻，同時日本冇暗示再放水，令美元上周低收告終。
美滙指數周三曾升至97.82，創兩個半月高位，惟全周收市倒跌0.2%報96.95。彭
博追蹤十六隻主要貨幣中，英鎊、日圓、加元表現較佳。
儲局今次會後聲明重點有二，首先是刪除擔心外圍經濟呢個加息障礙，其次是講明12月會研判是否加息，言下之意係加息嘅燈號經已由紅轉黃，大家要有個心理準備轉綠燈。但年底得唔加得成，關鍵還看就業和通脹。從就業角度，若年尾兩個月每月能增加十零萬職位，儲局應該收貨；至於通脹，儲局一直強調有信心中期通脹能重返2%目標就去馬。
日圓可逢高沽
展望本周，焦點梗係美國10月就業報告，市場料增18萬個職位，數據好壞勢主導美元升跌；其次是澳洲儲備銀行周二議息，事關該國上季年率通脹出乎意料降至1.5%，反映通脹下行壓力增加，雖然市場估今次唔減息，會後聲明對前景看法足以左右大局。
策略方面，日本央行上周五冇動作，行長黑田東彥隻字不提會否加碼放水，令日圓兌美元反彈至120邊，但日本上季GDP應該唔多掂，遲早要加碼放水，日圓仍可逢高沽。
奇兵
本欄逢周一刊出
奇兵
滙海探戈 - 奇兵 舊文