智取大市：
最不期待畫面出現了
近期港股走勢實在係最不期待嘅畫面，原因係想搵隻有成交又有把握狗衝嘅股都難，同時個市陰跌，又唔係跌得多，揸貨又陰住輸，揸cash等博反彈？又見唔到有好可觀嘅博反彈空間，就當恒指下試22000點，之後反彈到22700點，嗰700點可能三兩日升曬，畀你打得好
、博得中，贏錢都係有限數，NAV最多三幾個巴仙增長；但係一個唔該博錯邊，分分鐘輸唔止三幾個巴仙。
晉佳實在唔鍾意陰跌，要跌就寧願好似7月嗰種跌法，即使捕捉唔到7月8日低位，當你7月9日先至反手追貨，其後要博一、兩成回報並不困難，家陣要有一成回報真係揼石仔都未必揼到番嚟。
之前提到恒指月線圖23500點係金融海嘯至今上升軌，早喺7月已經跌穿咗，然後10月再反彈至23500點附近即遇阻力，所以之前反彈，暫時可以睇成長線跌浪嘅後抽，長線睇跌。睇到月線圖咁長線，可靠性相對高。
與此同時，恒指周線圖上試保歷加通道中軸然後轉弱，往績顯示，恒指通常至少有三幾個星期弱勢，所以有可能衰到11月中，先有機會喘定，年底始終係股市淡季，難大升，大跌同樣甚少發生，所以小弟唔相信整個11至12月都係跌，11月中開始，可能有博反彈嘅機會，所以呢一刻不妨等嚇，唔好亂出手，始終搵食艱難，大前提係要保住子彈。
中海物業回吐先諗
唔計殼股，近期要搵有增長故仔可以有遐想嘅股票，的確非常唔容易，因此中海物業（2669）啱啱上市，就已經日日幾億元成交，市值細、流通量大，晉佳聽聞有個本地基金經理飯局，幾個基金佬同枱坐埋吹水，原來一枱裏面已經有三幾個有幫襯2669，可想而知，港股冇嘢炒嘅程度，令一班基金佬餓波餓到喪搶一隻50億元市值都唔夠嘅半新股，正所謂人多擠迫，好嘢個個知，肯定一下子燒盡購買力，短線並非好事，睇怕中海物業肯定繼續chok餐飽。
講開中海物業，最值得一提係佢今年5月從中建股份、中海外（688）同中海宏洋（081）手上收購合共4間附屬公司，除咗向中海宏洋收購中海宏洋物業、後者盈利貢獻由4月開始計入中海物業盤數之外，其餘幾間新收購公司嘅盈利，由6月開始先至計入中海物業嘅業績。換言之，中海物業喺招股書上披露今年首5個月最新盈利數字，係做得非常保守，但就會做高今年其餘7個月盤數，所以全年業績一定靚仔。
有靚數保底，上市再炒高似乎係幕後心意，噚日7.69億元成交超多，已佔市值16.7%，亦只能推高股價半成，頗有飽滯之感，舞高之後，等佢回吐先再諗。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文