金融High Tea 2015年11月3日
拉人風暴
2015年11月03日
中港股市復市，本來有點悶局等消息，忽然間內地狂爆幾單拉人事件，消息來勢洶洶，搞到內地A股尾市跪低，若果不是人民幣入世界貨幣基金會特別提款權的消息頂住，個市可能跌得仲多。呢一浪拉人封艇事件咁勁，看來短期未必會完，所以對個市衝擊仲要密切留意住。
昨日
連爆幾單調查機構郁手消息，包括澤熙投資公司總經理徐翔因為內幕交易被刑事拘留、中央紀委監察部透露，東風集團(489) 總裁兼執行董事朱福壽涉嫌嚴重違紀受查、農行(1288) 行長張雲傳被帶走協助調查。
拉人封艇搞跌概念股
仲有一單同香港有關嘅係上海公安日前偵破一宗以貿易公司為掩護的股指期貨造市案，涉及過百億元人民幣的期貨交易。這宗造市案件屬於跨境操作，涉及歐資投行前交易員以及在香港註冊的公司。
當局拘捕伊世頓國際貿易總經理高燕、業務拓展經理梁澤中以及華鑫期貨技術總監金文獻等，涉案資金已被凍結。
咁多單案件中，市場反應最大暫時係私募基金經理徐翔被拉，由於佢係內地非常活躍的炒家，有所謂「徐翔概念股」的炒作概念，佢出事令到相關股份大跌，好多炒股都急挫，喺咁情況下，上證指數能夠險守3300點收市，收報3325點，跌1.7%；深成指數報11304點，挫2.1%，已經叫做跌得少而唔係跌得多。
內地開完五中全會，就猛爆咁多打老虎個案。之前有消息話執掌中紀委的王岐山潛伏好耐無露面，可能喺度搞緊大案，睇來真係空穴來風。市場最關心係爆完呢一輪，唔排除仲有消息繼續爆。喺咁情況下，內地股市抗跌力已算唔錯。
本來，市場估計呢個月世銀可能公佈人仔加入特別提款權的進展，個市會炒番一轉，依家多宗大案曝光，點都會抵銷咗部份利好因素。昨日港股下跌，開頭話同公佈嘅經濟數據唔靚有關，?家看來應該係同調查關係可能大啲。
內地經濟數據發表，財新中國10月PMI回升至四個月高位，官方PMI則連續三個月收縮，創近七年來新低，有市場人士認為數字唔好令港股腳軟，但睇真財新中國PMI比預期佳，港股因應數據跌幅唔係咁大。反而，A股午後再瀉，港股跌幅先加劇，尾市一度插成308點，低見22332點，收市恒生指數報22370點，挫270點；國企指數收報10240點，跌156點，成交金額674億元。
傳出高層被查的農行(1288) 挫2.5%，報3.1元。基本上國企有高層被查，股價都會插一插，但佢哋係國家擁有，跌完之後可以企穩，但好似「徐翔概念股」呢類以莊家為號召的股份，跌幅可能仲大，所以如果有市場人士被調查，買中涉及公司的股票，咁就算個市升都無用，呢個亦係內地炒家揸莊股份的風險所在。
兩孩股有胡食咗先
另個，炒兩孩政策的多隻嬰兒概念股玩咗兩日就回落，蒙牛(2319) 急吐8.5%，報13.78元，跑輸一眾藍籌股；計劃購英國玩具品牌的千百度(1028) 股價急速回落至2.94元，瀉8%。正好我之前所講，兩孩概念難炒在無乜好股可揀。好似好孩子(1086) 爆升，在10月29日就被美國資本集團(The Capital Group Companies， Inc.)減持375萬股，持股量由6.01%減至5.68%，佢市盈率唔係咁低，生仔又起碼要等十個月，所以短期業績未會改善，有高價我都走啲貨先啦！
陸羽仁
金融High Tea 舊文