一周三件 - 錢雋 2015年11月6日
一周三件：威華達概念足
■威華達配發近13.4億份非上市認股權證，每份正股兌換價0.65元。圖為集團主席陳巍。 資料圖片
券商股一個深港通開波舊聞翻炒，隻隻已經生猛曬，證券瓣數，場內威華達控股（622）PB數一數二平，現價又比呢期啱啱獲通過配發認股權證嘅正股行使價潛水，威華達已經有向上炒嘅理由。
現價入場平過大戶
威華達啱啱7月7號舉行股東特別大會（SGM），通過配發近13.4億份非上市認股權證，每份正股兌換價0.65元。過癮嘅係，呢批認股證係必須「強制行使」。又認股證若果獲全數行使換股後，可以集資8.6億元，size唔係細，承配人唔係一般散戶。而威華達SGM日子，撞正港股大插插期，之後絕大部份日子，集團喺0.3到0.5元上落，而現價（0.485元）比認股證行使價，潛緊水23%。家陣買威華達，平過呢批富貴投資者。
威華達除咗證券瓣數，本身亦有落場，而今年6月尾，集團嘅金融資產值，就比上年尾翻咗一番，到41億元，但手頭所揸淨現金11.3億元，同上年尾11.6億元差無幾。威華達無另花銀彈投資，但證券價水漲船高，威華達亦係股壇高手。
又周三市場翻撻深港通，個市即刻發咗癲，大家都肯落場，加埋臨近年尾結算，斷估個市唔會太差，威華達證券增值，應該keep到靚仔水位。
以集團今年6月尾NAV0.84元計，得0.58倍PB，調整到同另一隻第一上海（227）一樣咁抵。而主打香江嘅券商股，平均1.2倍PB，威華達平咗近半！
炒威華達，去番認股證行使價0.65元，講緊要升34%，到時，集團PB仲喺0.77倍，未有耐追到行家平均值，兼啱先去到認股證承配人嘅起步位。
錢雋
細價股專家
本欄逢周一、三、五刊出
錢雋
一周三件 - 錢雋 舊文