金融High Tea 2015年11月6日
歐日量寬炒一炒
2015年11月06日
聯儲局主席耶倫繼續話十二月份有可能加息，令港股一度受壓，但A股周三爆上後，昨日繼續抽高，恒指雖然收市微跌兩點，但券商股造好，甚有跟住內地炒的味道。上證綜指連彈兩日升破3500點之餘，外媒話留意到散戶入市增加，似乎外資對內地股市的睇法有好轉。
外資似對內地股市改觀
聯儲局主席耶倫呢排變咗政治磨心。九月份唔加息，十月份就話唔排除年底會加，佢嘅講法被市場人士質疑係彈弓口之餘，佢被鍾意玩人嘅惹火總統候選人特朗普「串爆」，話佢掛住聽總統奧巴馬話，遲遲唔肯郁手加息。特朗普喺商界出名係串嘴兼出位王，上電視做埋節目，開口埋口YOU"RE FIRED。呢次參選就專玩踢爆，搞到神憎鬼厭。
雖然串嘴王把口臭，但佢喺政經界浮沉到有今日的地位，點都有少少料到。佢開口插耶倫所以都插得幾應，搞到主席要出來再補飛，重申十二月有機會加息。雖然聯儲局主席話收水，但市場眼前就炒緊歐洲十二月份加碼量寬同日本放水，所以美股暫時對可能加息反應未係咁強烈。
外圍着眼息口去向，A股就繼續急升。內地開市雖然略有回調，但唞唞氣再炒上。國家主席習近平會晤馬英九催漲福建自貿區概念熱度不減，福建自貿區概念股漲幅近9%，上證全日就報3522點，升63點；深成指數報11939點，升54點。
內地尾市升幅略為收窄，香港恒生指數收造23051點，跌2點；國企指數就有得升，收報10617點，漲56點，成交縮至843億元。內地大炒券商股，香港券商股都造好，銀河證券(6881) 抽升5.4%，廣發(1776) 升3.4%，跑贏一眾國企指數成份股。
騰訊新聞問內地散戶究竟依家係反彈抑或牛市重啟，散戶仲係幾審慎。上證綜指同8月26日低點比，反彈接近20%，按照技術派定義，反彈若能突破20%，就係牛市重啟嘅指標之一，經過昨日再彈，理論上已經符合咗呢個定義。
內地股市今年大幅波動，其實唔能夠用傳統走勢分析，反彈20%重返牛市之說，我認為有點過分樂觀。要留意係內地股市政策效應強過西方好多，令到走勢被扭曲。值得一提反而係彭博社話，留意8月股災之後國家隊入場救市，儘管救市資金依然在影響市場，但股市尾盤拉升的次數愈來愈少，表明政府對市場的強力干預已大幅減少。同時，槓桿交易開始回升，成交量開始企穩，散戶投資開始推動市場上揚。言下之意係覺得依家個市「復得返自然」。
據報道引述里昂證券高級策略師Francis Cheung話，希望拋售的投資者已經拋售，政府也成功打擊賣空行為。現在市場上漲相對容易，特別是還考慮到市場預期政府會進一步降息並推出更多刺激措施。
半新股好在無蟹貨
報道話，政府或者政府支持的基金在購買券商股，這樣做能快速激發整個市場的人氣。呢幾日內地金融股領漲，國信證券分析師Zhao Bingtong就認為，金融股上漲讓一些投資者感到牛市已經回來，政府關於下一個五年計劃的細節都提振市場氣氛，但大市短期能否喺三千五百點企穩，仍然是非常關鍵。
近排個別半新股創出新高，IMAX(1970) 升4.6%，造46.75元，另外分拆掛牌的中海物業(2669) 收報1.51元，升4.9%。半新股數量唔少，佢哋有部份旨在「啤殼」，業務前景無料到，有部份質素唔錯。佢哋如果質地好啲，勝在無乜蟹貨，炒上會相對容易。
陸羽仁
金融High Tea 舊文