中環在線：查太洪丕正搵周公過聖誕
■聖誕臨近，財經各界人士都準備好節目度佳節了！
今年時間好似過得特別快，港股大時代令人興奮一陣，之後跌市加悶市，轉眼咁就到咗聖誕節，財經界唔少人都趁聖誕長期去旅行叉電，不過亦有成日飛來飛去嘅大忙人寧願留在家中搵周公！
華華早排見到金融發展局主席史
美倫（查太）與渣打銀行大中華及北亞地區行政總裁洪丕正，兩位異口同聲話，「放假最好喺屋企瞓！」查太話，出差已經成日飛來飛去，有得放假可以留喺屋企，偷嚇懶、瞓多兩個鐘，都已經好奢侈。洪丕正非常認同查太呢個講法，話頂多去個短trip就算。
黃國英北歐過白色聖誕
遠展（035）主席邱達昌今個聖誕節就會同家人去台灣與日本玩，先去台灣兩日食嘢，嘆完台灣菜之後，成家就直飛大阪。佢話，今次佢4粒寶貝孫都會同行，最大4歲，最細得9個月，所以今次隨團仲會帶埋4個工人去幫手，浩浩蕩蕩一行14人。
豐盛金融資產管理董事黃國英就飛得遠啲，佢噚日正式收爐，跟太太飛去北歐，喺雪國過真正嘅聖誕節，佢此行會去北歐四國（丹麥、瑞典、挪威、芬蘭），冰島就太遠，唔去了。佢都有啲怕凍，不過check過北歐天氣𠵱家唔算太冷，應該支持得住咁話。佢預計明年1月4號先至返工。
至於我哋嘅財爺曾俊華，佢早前自爆，聖誕休假在家閉關，準備明年嘅《財政預算案》；聞說財經事務及庫務局局長陳家強亦都打算留港消費，可能準備隨時同財爺傾嚇《財政預算案》都未定喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com