見身郁唔見米白
2015年12月24日
港股進入假期情緒，炒家專注炒作細價股，大藍籌交投反而變靜，但個市就頂住上，仲要內地跌香港都升。股市仲有幾個交易日就結算，估計基金唔會有大動作，似想頂在高位年結。
恒生指數昨日收造22040點，升210點；國企指數收報9882點，升151點，成交增至508億元。在內地股市
跌0.4%的前提下，國企指數仍然升1.6%，可見芬佬唔想市跌。
多隻創業板股份突落鑊勁炒，其中配售上市半新創業板股份立基工程(8369) 、Fraser(8366) 及應力(8141) 大升，立基收造0.41元，喪升41%，更是升幅最大個股；Fraser炒高18.55%，報0.147元；應力急飆17.9%，報0.395元。個別有消息的創板股個別大升，家夢(8101) 擬購本港證券經紀業務，股價抽升22%，造0.072元。
癲炒股仔唔理資產
創業板癲炒之下，部份主板股份都搭吓順風車。南華集團(413) 公佈，擬將集團之鞋業貿易業務分拆在本港創業板上市，帶挈南華金融(619) 勁升14%，報0.088元。南華集團漲6%，報0.68元。南華集團資產豐厚，市值有40億元，南華金融市值只有6.6億元，所以俾人一炒就炒起。
今年聖誕市道不過不失，不過零售生意已經唔易做，皆因市道增長放慢之餘，成本並未跟隨下降。前日759阿信屋母公司CEC國際(759) 公佈中期業績，收入及毛利上升，純利卻大減逾半，正式見身郁唔見米白，有勞動無成果，股價即時插低，幾近抵銷周一的升幅。
有中環茶友坦言，其實佢都唔明點解大家會估公司會有好業績，喺業績公佈前炒高。茶友認為，CEC某程度係個別媒體吹出來的神話，加上配合炒高，曾經威過一陣，但佢大開分店成本好高，睇番股價近三年走勢浪比浪低，證明市場根本唔認同呢種急速擴張的營運模式。
CEC近年大搞零售，一時話搞雲吞麵店、一時又話搞專售化妝護膚品Kawaii。不過，管理層喺中期業績透露，新舖成績未如理想，決定暫停化妝護膚品店擴張，將之併入面積較大的阿信屋，以店中店形式發展。
管理層亦好老實咁講，零食屬休閒食品，若經濟狀況進一步轉差，需求很有可能隨此下跌，公司不會坐以待斃，正積極發展零食以外的進口及零售業務，已引入更多糧油副食品、冷凍及冷藏食品、家庭用品及個人護理用品等民生必需品。759阿信屋已向最大業主領展(823) 及房委會，盡量爭取租用容許賣米及糧油副食品之位置，給予業務發展有更大的空間。
CEC最壞情況恐未過去
茶友睇完管理層報告，就對公司前景唔係咁睇好，皆因公司同大業主講想賣米糧，大業主好簡單，總之乜事都係有錢有商量，就算畀你搞，畀完租係咪可以賺多啲錢先。更重要的是，公司專門店生意唔好，咁做唔做落去先？若然唔做落去，咁間舖裝修係咪報廢先？以公司半年賺幾百萬元，恐怕最壞情況未過去，郁啲見紅都唔出奇。
本港零售從來難做，十個做零售，九個幫地產商打工，所以十個做零售，九個其實都係投資地產，開間舖整檔生意，頂到按揭打個和或賺到人工，已經叫做好，咁樣捱得十年八年，間舖升值賣咗佢，間舖先係真賺。CEC幾年前大搞零售，一於概念先行，佢唔買舖而係租舖，好快就見到通街都係阿信屋，股價一度爆上4元樓上，之後跌多升少，依家只有1.54元，唔見咗差不多70%，依家市值10億元，如果唔計賣殼價值，隨時仲有得跌。
陸羽仁
金融High Tea 舊文
來源 source: http://hdfin.stheadline.com