魚樂無窮：巴塞三叉戟股市版
■巴塞三叉戟唔使出齊都高對手幾班，同樣道理可套用在美克身上。 資料圖片
A股暴力救市喺下月便足半年，大股東禁止減持令亦隨即鬆綁，消息在市場不斷發酵，觸發A股昨日午後一瀉如注，滬綜指全日挫近3%，3600點魔咒未能解除。A股唔爭氣，港股靜市下舞落唔舞上，恒
指失守22000點，如果阿爺弱勢持續，成交又薄過張紙，再下試21000點絕不出奇。
水能載舟亦能覆舟，成交低迷推冧大價股，細價股卻乘勢起錨，中國9號健康（419）有騰訊（700）、華誼兄弟同埋馬雲旗下雲鋒基金坐鎮，兼有交易所開綠燈，成功避過現金資產公司規範。用咗半個月時間消化春江鴨沽壓後，噚日一棍炒高15%，只要守住1蚊大關，有力再上一層樓。
美克（953）同股唔同命，早前同樣獲猛人垂青，包括騰訊、「中國梅鐸」黎瑞剛及殼王陳國強，星味十足，但卻因入股後變成現金公司，被叫停交易。11月中宣佈上述壞消息，雖然翌日裂口低開，其後卻極速攀升，最新價0.87元，較壞消息出籠前還要高兩格。點解咁硬淨？無他，通告講到明，雖然未竟全功，但會「尋求讓投資者之一或多人參股」。巴塞有美斯、蘇亞雷斯、尼馬，唔使出齊都高對手幾班，同樣道理可套用在美克身上。咁幾時傾掂數？冇人知道，但近月持續橫行，技術上有突破機會，話唔定中國9號健康炒完，就會輪到佢！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com