雙贏的財技
2015年12月29日
近年底市況較淡，你中午揸車出中環就知，平日半小時的車程，昨日15分鐘就到，暢通無阻，可見好多金融界人士都放假未返。所以見個市跌218點，跌1%，但唔好以為個市好差，2015年尚有兩日半交易日便結束，只不過是市靜而已，成交只有407億，沽都唔係咁多人沽。恒指昨日高開13點報22151
點，午後內地股市急挫，拖累港股失守兩萬二大關，恒指收報21919點，跌218點或0.99%；國指收報9789點，跌163點或1.65%。
昨日主要跌內地股市，當中主要跌B股，拖低咗內地大市。午後B股加速下插，收市大挫7.9%，搞到上證綜指跌2.6%收場。但大家可能無注意，在7月股災之後，內地B股指數連升三個月，已升了70%，回歸到股災前水平(好過港股好多)，升咗咁多臨近年尾，一有小小風吹草動，資金就獲利離場，搞到昨日急插，但亦唔係有乜驚人壞消息。
以內地跌2.6%，恒指只跌1%及國指只跌1.7%計，港股又唔係太想跟足內地跌，可說是買賣兩閒而已。昨日跌幅較大的是內險股，國壽(2628) 跌2.7%、太保(2601) 跌2.6%，佢哋因為持有內地金融資產，比較跟到內地跌幅。內房股硬啲，中海外(688) 只跌0.6%，個別仲有得升，如深控(604) 和龍湖地產(960) 升2.2%。
電訊股唔怕拉人炒重組
內地電訊股打破老闆一被人查就下跌的宿命，曾擔任中國聯通(762) 董事長的中國電信(728) 董事長常小兵被查，兩家公司股價雖跌，但好過大市，聯通只跌0.6%，中電信跌1.3%，皆因市場估緊打咗電訊大老虎，反而意味電訊業重組好事近，咁搞定一定兩隻股隨時炒上都唔奇。
市靜講吓財技。最近個別地產公司有派高息動作，最明顯是頻頻售產的華人置業(127) ，宣佈出售銅鑼灣皇室堡予大股東，作價不高於120億元，交易後會將套現用作派息。之前集團以高價出售灣仔商廈予恒大(3333) ，雖然交易以六年分期付款進行，但公司仍然把部份套現所得用作派息。由於華置過去多番向大股東出售資產，加上大股東持股量高達七成半，派息又係派番七成半畀自己，市場估計此舉是方便大股東收到錢再買資產。在出售銅鑼灣皇室堡後，甚至有人估計公司會鋪路私有化。
由於監管法例趨嚴，近年公司私有化成功例子買少見少，市場人士認為，好似華置不斷出售資產的做法，差不多有變相私有化效果，由於主要資產已經轉入大股東名下，未來是否私有化已唔係咁重要。
無論動機點都好，從小股東角度，公司有幾靚資產都好，唔可以體現出嚟都無用。好似華資不斷賣資產兼派息，推高股價之餘，小股東仲有真銀落袋，估計過去幾年，大、小股東合計差不多袋咗近300億元落袋，股價加股息回報，同呢幾年低位比翻了幾番，喺咁情況下，小股東都唔需要理背後有乜理由，總之就十分OK，因為公司潛在價值得到體現，大小股東都雙贏。
另一家早前有大舉派息行動的是冷門股渝太地產(075) ，公司在12月17日建議以40.21億元向主席張松橋出售多項物業，當中包括尖沙咀彩星中心、中環世紀廣場及渝太物業管理。
此外，集團計劃向獨立第三方收購倫敦核心商業區的四層高大廈物業餘下50%，連同貸款合共約5.9億元，並會以出售事項所得資金支付。
不過，最刺激係集團話出售物業俾主席後，會把所得不少於74.6%用作派特別股息，有人計過等如每股價不少於3.75元，比起公佈前市價3.1元仲要高，消息公佈翌日股價即刻大幅炒上5.95元，即係炒高咗92%！(昨日收5.79元)今次最特別係集團主席不是直接持有渝太股份，而控股的渝港(613) 持股量亦唔算高，比率不足34.14%，即係有大部份派咗出街，小股東當然大叫好嘢。一般而言，大股東玩財技，如果小股東無着數，都會媽媽聲，但呢啲大小股東齊齊分水的財技，小股東只要有錢落袋，都會叫好。
家息口向上，好多大股東對自己公司持有大量物業，取態傾向保守，若然公司有大量現金或資產，部份可能會透過賣產套現同派息。
不過，如果想吼呢類公司，除了睇公司財政係唔係充裕外，最重要係留意大股東狀況，如果大股東有套現興趣，同埋持股量高，咁機會先至會大，因為好似渝太咁樣益人，做法始終係少見啲啦。
陸羽仁
金融High Tea 舊文
來源 source: http://hdfin.stheadline.com