中歐等住出招
2015年12月17日
聯儲局加息幾成定局，正如之前預料，壞消息快兌現就搶先買貨，全球股市以升市迎接，港股承接美股杜指上日彈升156點之勢，昨日一來就高開，好明顯係資金提早在加息消息證實前偷步入市。
股市初步看來消化息口上調的消息，焦點跟住就落在聯儲局點樣展望利率趨向。若然聯儲局話仲會持續加息，
反彈可能好快玩完，但若聯儲局暗示加完會觀望，咁有個較長的反彈都唔出奇。我斷估聯儲局始終會覺得開始加息是大變，所以多數是溫和口氣居多。
有銀行家人士同陸羽仁拆局，話炒家偷步入市有兩個理由，一係博阿爺喺美國加息後出手護市，放出好消息，喺呢兩日睇到人民幣離岸價開始跌唔落，顯示短線大家都驚阿爺會喺加息落實後托番人民幣轉頭，短線頂一頂。
香港水浸 短期未必跟加
再者，係美國加息後，一般人料香港會跟，但本地而家水浸，除非短期有大量資金流走，否則短期香港未必會跟加，如果香港唔加住，咁港股順勢夾夾都唔奇。
唔理乜嘢原因，港股昨日一彈都算有力，只係成交唔多夠。恒生指數高開283點報21557點，已是全日低位所在，隨後大市最多升498點，收造21701點，升426點；國企指數收9538點，升194點，表現繼續好過大市，成交可惜只係增至679億元。
匯控(005) 、騰訊(700) 、中移動(941) 及友邦(1299) 成為升市火車頭，四股推高恒指176點。
喺聯儲局開會前，港股跌足9日，雖然不算跌得太兇狠，但論下跌日數已成為31年來最長跌市，本周二國指已搶先回升，顯示部份春江鴨提早入市。
比較之下，歐洲股市同內地股市，對呢次加息承受力較強，回調幅度無咁大，反而香港出現九連跌至反彈，陸羽仁相信有兩個理由。一係香港利率政策受聯繫匯率束縛，難以自行調節，受加息和跟美元升值兩大因素牽動，美國經濟強，香港經濟弱，即使拖遲半年，最後都要硬食加息。相反，歐洲同內地有自己的利率同貨幣政策，美國收水，中、歐可以放水，至少水頭較足。
歐洲央行之前量寬規模比市場估計細，唔排除佢係預留水位畀自己等美國加息再出招。同樣，過去一個月，阿爺無乜財稅大動作，相信都係等緊美國出招，若然出現城門失火，一見資金外流加劇，就放水救災，正因為咁，所以國指有條件率喺美國加息前先行反彈。
短炒紅色股博反彈
另一個理由，港元匯率跟美元走，但本地經濟循環正走下坡，喺強美元之下，香港服務同產品變相仲加價，咁對旅遊和出口就傷上加傷。反而歐羅同人民幣，匯價同美元反方向走，美元升雖然會令資金外流，但對佢哋出口有利，內地股市同歐洲股市反映埋呢點，走勢稍為靚仔啲。所以短期策略是跟炒國字股，博食一浸反彈浪。
美國加息，本地銀行水浸，結餘有3900億，3個月拆息只是0.39厘，所以本地可能半年暫不加息，不過樓市受加息周期到的心理影響，仍然淡靜，但超級豪宅仍有成交，樂聲電子(213) 宣佈出售豪宅項目，獲利兩億幾，以公司市值不足10億，呢單交易相當和味。
樂聲電子經營手錶同物業投資，近年地產生意賺錢好過做廠。佢專注精品市場，投資手法唔錯，出售香港豪宅項目後，目前有兩個加拿大多倫多項目興建中，佢對當地市場有一定經驗，只係加元今年下跌，唔知會唔會有影響。多倫多樓市未受疲軟經濟影響，表現仍然不俗。好似呢類三、四線公司，派息同經營唔錯，無奈交投太少，只能當係收息股看待。
陸羽仁
金融High Tea 舊文
來源 source: http://hdfin.stheadline.com