中央會議 借機炒炒
2015年12月22日
美股上周五大插，大家以為港股必然衰硬，結果出乎意料，港股開市無耐已經企穩，收市仲倒升，主要原因係內地召開中央經濟會議，加上內房巨無霸萬科(2202) 爆發控制權爭奪戰，令國企指數繼續發揮定海神針作用。
美股喺加息前若無其事，指數仲搶先炒上，但加息升完後淡友發難，在
美國期指結算前，推低杜指近600點。有中環茶友事前估計，今個星期開市恒指有機會鋤低，試一試兩萬一千點的支持，佢仲諗住若然指數下插，就入市博下短線反彈，點知個市抗跌力比佢想像強，大市昨日早段稍為回落，跟住仲倒升番。結果，恒指收造21791點，升36點；國指收9746點，升112點，成交大縮至599億。
執平貨仲要等機會
茶友諗住執平貨，結果空手而回，但佢唔會心急，今次買唔到，就等埋下次，反正佢覺得個市暫時無大升條件，就算喺低位入咗貨，都未必有足夠水位沽貨獲利，寧願再等一下。
內地上證綜指升1.8%，拖住港股上。原因係炒剛開完的中央經濟工作會議，會議公告有兩點較吸晴：第一，中央政府將幫助農村居民在城市定居，協助他們購買房屋。估計阿爺借此解決內地樓市庫存；第二，公告提到中國將逐步提高赤字率。估計阿爺要加大開支救經濟。不過呢啲政策大方向，可炒可不炒，內地炒上除了為會議贈興之外，不排除內地有好友仲玩緊一轉炒上。
另外內地個市氣氛好，也受萬科收購戰影響。深圳內房商寶能增購成為第一大股東後，萬科宣佈停牌一個月，籌備重大資產重組。外傳萬科籌集資金300億元打股權狙擊戰，當中200億元來自盟友中糧集團，但中糧集團董事長寧高寧否認參與萬科股權增發。
另一邊廂，財新網引述知情消息指，寶能系已在香港買殼，並大展財技。寶能系還打算透過控股的香港上市公司中國金洋(1282) ，以發行債券或股權質押的形式，融資百億港元。換言之，香港有可能成為呢場收購戰的融資平台，若然係咁對當然會順道刺激埋大市氣氛。
萬科成為皇帝女，港交所權益披露顯示，惠理於12月15日，按每股20.32元，增持331萬股萬科，持股量由4.77%升至5.03%。喺萬科魅力大增影響下，情況有些相似的綠城中國(3900) 都受追捧，收市報8.43元，升4.5%。綠城原本由宋衛平打骰，年前他失去公司控制權，香港財團九倉(004) 入股取得24%股權，一度派遣多名代表入局，可惜融合效益唔高。今年，中交建(1800) 逐步增持股權至28%，成為單一最大股東，九倉決定將綠城股權由聯營公司改作投資項目處理，即係隨時可以賣得。綠城現時雖然有國企做主要股東，但基本上沒有絕對控制性股權，故此引起市場跟進炒作。
深圳股可低吸
撇除併購因素，部份券商近日都看好綠城表現。中金上星期發表報告，指出政治局會議強調房地產去庫存以及農民工市民化，認為房地產市場以及城市發展問題將被提到一個新的政治高度，有望為行業帶來一籃子政策調整。
該行首選是基本面穩固的發展商，如華潤置地(1109) 、綠城、中海外(688) 以及深圳控股(604) 。四隻股份中，綠城因為控股權未明朗，多了一個炒作概念，如果喺股價未升前，呢個概念就變成附送，依家佢借勢炒高，如果想利用呢個機會短炒，就變成自己執生。相反，其餘三隻股份無因為萬科收購炒上，投機味道無咁濃。
早兩日，深圳爆發山泥倒塌慘劇，深圳兩隻地產股深圳控股同深國(152) 輕微受壓。呢兩隻股第四季表現不俗，若然看好深圳，可以借佢回落時吼吓。
陸羽仁
金融High Tea 舊文
來源 source: http://hdfin.stheadline.com