中環在線：Jimmy Choo分享造鞋心得
新娘奄尖過名媛
■周仰傑上月出席活動，即席以3、4分鐘畫出一個鞋款（小圖）。 李潤芳攝
高級鞋履設計師周仰傑（Jimmy Choo）嘅高跟鞋，對女士有份說不出嘅魔力。佢2001年悉售品牌一半股權，近年多花時間做慈善工作，上月就為一個慈善設
計活動來港數日，分享造鞋心得，對佢嚟講，最難服侍嘅客人原來係準新娘。
才女王迪詩曾說：「女人的路，是由高跟鞋走出來的。」可見一對靚靚高跟鞋對女性何等重要。周仰傑甚至形容：「無論係高矮肥瘦，高跟鞋同女士一齊分享經歷。」都幾誇張。
隨身帶備素描簿
67歲嘅馬來西亞人周仰傑，11歲開始跟爸爸學造鞋，認為手造高跟鞋最靚，相信機器無法取代手藝。佢話：「𠵱家整鞋係由機啤出嚟，鞋胚同鞋底嵌入去就得。但以前手工造鞋，由一塊皮革開始，由畫草圖設計鞋款，全部要自己做。」
手造高跟鞋需時最少兩至三星期完成，每對幾千蚊至過萬元，周仰傑認為價錢合理，因為「一對鞋嘅價錢包括時間，仲有造鞋師傅嘅手工，當然亦要計埋舖租與人工」。
幾十年來，周仰傑招呼唔少名媛明星，講到最難滿足要求嘅客人，佢首選準新娘。佢話：「為新娘訂製鞋最具挑戰，佢哋多數早6個月籌備婚禮，我哋先要睇咗婚紗款式，然後按新娘要求不停修改，可能體型有變又要再改、再造，直至結婚當日為止。」
周仰傑喺2001年前賣走品牌股份，近年較多時間做慈善工作，但佢對造鞋熱情從未減退，身上必定帶住設計師嘅孖寶，就係素描簿與十幾支marker，一有靈感就立即畫低。
佢透露，未來有機會去內地發展高級鞋履市場，至於會否來港開業，就要視乎緣份。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com