金手指：野蠻女的啟示
■大帽山港女有如投資的反面教材，提醒大家買任何投資產品前都要做足功課。 資料圖片
早兩日，寒流襲港，其中最有劇力嘅短片，係一段港女同差佬嘅對答片。事源大帽山第一晚寒流，大批市民上山後出事，路面結冰，消防難救援，政府封路。短片就係有港女想登上，但差佬唔畀。
港女咆
哮：「我哋有危險我哋自己負責，條命係我哋自己㗎嘛！」合情合理。不過剪接下，下一鏡件港女就對住差佬話：「救人係你嘅職責！」自相矛盾？不過對我最有啟發，就係佢最尾對住差佬嗰句：「就係因為你哋呢班柒頭，搞到咁多人要俾人救。」
防範太嚴阻礙發展
點解財經欄要講呢段片？因呢件港女就係最能代表香港𠵱家進行緊，最核心嘅價值觀戰。買任何投資產品，做足功課，有如知道天氣、路面會點先登山。以前嘅香港，冰點登山或投資，如果最後出事，社會共識就係「抵死」。傳媒、八卦佬再將死因大肆渲染，成反面教材，大家都可從你嘅失敗中學習。
𠵱家呢？唔畀冰點登山，因「抵死」已死。連出事本人都一句：「救人係你嘅職責！」你講得出呢句，又點會畀你上山？當年，雷曼迷債班投資者出咗事，咪又係咁嗌：「還錢！還錢！還錢！」
救人有咩問題喎？當你冇咗「抵死」，就首先乜叉都禁。最後冇得禁，就要「預先做嘢」，例如打風冇得禁出街，費事有人俾樹揼親，所以啲舊區大樹要先鋸。投資驚你輸，應該話驚你輸完嘈、賴，就乜叉都禁、乜膠都係非法集資。失去勇士成功登山、創業家試到新嘅服務、產品。
如有香港銀行因資不抵債而擠提，存款保證會即時50萬變無限，無限moral hazard。跟住學愛爾蘭咁，政府財政一Q清袋，繼而北京接管，一國兩制落幕。冇咗「抵死」精神，香港亦玩完，所以重申，係時候賺夠移民。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com