忍住抽筋 先醫頭痛
2016年01月26日
外圍市況好轉，加上油價一度回升，港股在超賣後再彈，在十天線徘徊。港股呢兩個交易日都係幾典型嘅反彈格局，恒指昨日最多升410點，高見19490點，但始終係購買力唔夠，大市午後腳軟，指數最終只升至不足300點，未能企在十天線上收市
。恒指收報19340點，反彈259點；國企指數收報8173點，升68點，成交金額744億元。
暫不降準保住人仔
個市有得彈，近因係人民幣同港元匯價先後企番穩。金管局總裁陳德霖早兩日出來派定心丸，話今時唔同往日，大鱷要再玩股匯雙邊操控唔係咁易，因為亞洲金融風暴後，金管局放大咗個資金池，銀行體系結餘多達3700億元，金管局有很多票據可作緩衝，大鱷要推郁成個池水，涉及數似千億計資金，相信大鱷好難重施故技。
亞洲金融風暴時，香港係實行最基本的貨幣發行局制度，總之就用7.8做界，推一推就郁，當時亦無咁大個資金池，所以掟粒石仔落個池，就足以翻起大浪，後來金管局發覺咁樣好易俾人興波作浪，於是擴大了匯價上、下限，同時增大資金池，家再掟粒石仔落去，震盪好快會被池水吸收晒，所以要搞郁池水，除非用大石去轟炸，所以點解港元匯價上周跌破7.8，跟住再上番，就係池水大咗吸收震盪嘅效果。由於港元反彈企穩番，港元就有得彈吓。
雖然聯匯同港元防震力有改善，咁係咪代表雨過天青無事呢？答案就未必，因為講到底，呢輪震盪震央係中國同人仔，所以除非內地經濟同匯價搞番掂，否則都未係安枕無憂。陳總98年有打大鱷經驗，我地靠佢睇住個場啦。
最近呢次中港股市暴插，源頭係人民幣匯價不穩，阿爺愈來愈意識到呢個問題，故此穩定匯價成為短期決策重點。新華社上周五出英文稿發警告，話隨着中國金融管理當局採取措施穩定人民幣匯率，這些試圖做空人民幣的「激進」投機客必將遭遇巨大損失。中國政府有足夠的資源和政策工具來確保經濟形勢處於控制之下，並且應對任何外部挑戰，惡意做空人民幣或將面臨法律嚴懲。阿爺出英文稿發警告，似乎怕老外睇唔到中文稿喎。
淡友長期睇法唔會改
另外《華爾街日報》就引述人民銀行上周二召開的會議記錄，為穩定人民幣匯價，人行決定推遲減息降準。報道引述消息人士指，會上人行關注人民幣匯價，以及農曆新年前的錢荒問題，官員憂慮現時採用傳統寬鬆貨幣工具，如減息降準，對人民幣造成更大貶值壓力，決定推遲運用這些工具，為令銀行有能力應對現金需求，人行於過去一周，透過短期及中期貸款工具，為銀行注入16000億元人民幣短期流動性。
家內地好似頭痛兼抽筋同時發作，中央頭痛醫頭，看來都係決定先醫好頭痛先，先穩住人仔。根據家形勢分析，唔排除港股係農曆年前會有平淡倉盤帶動的反彈，但行得幾遠就真係唔知，因為睇淡內地的外資，唔會因為咁改變睇法，甚至會因為爺無得放水救經濟，認定放緩會加劇。如果想買股長期投資，係佢已從低位回升近800點後，家入市又未夠平啦。至於想玩反彈，就要自己睇睇身手有幾敏捷，走得慢小心挾住。
大股當中油股彈得較好，上周五國際油價報復式反彈，中海油(883) 急彈4.8%，報7.27元。繼發改委早前設定成品油「地板價」後，市傳內地醞釀上調成品油消費稅，有做下游業務的公司有啲影響，中石油(857) 報4.64元，升3%；中石化(386) 造4.29元，彈3.1%。油價大上大落，短炒油股者睇位落車袋住先好啲。
陸羽仁
金融High Tea 舊文
來源 source: http://hdfin.stheadline.com