中環在線：中信里昂預測猴年市況動盪
肖馬索羅斯料有斬獲
距離送羊迎猴仲有唔夠兩星期，經過震過貓王嘅1月，投資者已經變曬阿愁，中信里昂踩多腳，噚日發表風水指數報告，預計市場喺火猴年會更加動盪，好似馬騮咁曳。近期人氣急升嘅國際大鱷索羅斯生肖屬馬，中信里昂料屬馬嘅人今年有收穫呀。
大市3
月或反彈 吼金屬股
報告話，屬馬嘅朋友今年運勢平平，10分滿分只係得5分，要特別注意爭拗，提防有人放冷箭。最近不斷被官媒狙擊，就快86歲嘅索羅斯，雖然流年運勢冇特別，但中信里昂科技行業分析師馬卓藍就話，如果佢揀喺年中出手，今年好大機會有收穫。
今年猴年歲次「丙申」，天幹屬火地支屬金，由於五行火剋金，預示今年全年市場都會喺波動中度過。中信里昂仲話，因為火猴提早出嚟搗亂，所以中港股市開局先會咁差，不過再曳嘅馬騮都要休息，估計股市喺新曆3月就會反彈見頂，但6月市場又會遇到「四面楚歌」之劫，大市睇怕要下試低位，但可能係入市好時機。
至於短線有乜好買？中信里昂銀行業分析師丘文孚就話屬金嘅行業，包括貴金屬、金融、汽車等，上半年表現都會有支持，下半年就會比較平穩。不過屬水嘅行業，好似航運及運輸等，流年運勢參差。
■馬卓藍（左）話，屬馬嘅索羅斯今年要注意身體；右為丘文孚。 李潤芳攝 樓市大利正東西方
香港來年迎來火猴搗亂，引起動盪，樓市當然不能倖免。不過中信里昂就話，如果你買中正西方、正東方嘅樓，今年有望跑贏大市！
中信里昂預測，猴年正西方流年飛星係屬木嘅「四綠文曲星」，來年將會迎來風和日麗嘅好日子；正東方就有令好運倍增嘅「九紫星」，只要運勢得宜，都可以有好運喜慶。
中信里昂指，呢兩個方位嘅住宅與寫字樓，例如港島區柴灣、堅尼地城，大嶼山、東湧及赤鱲角，運勢都會「開花」有好日子過。雖然𠵱家樓市下跌，但換個角度諗，正東或正西方嘅樓，防守性都會大一啲咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com