期指結算托住沽
2016年01月29日
美國聯邦儲備局議息，對三月份是否加息沒有明確指引，未排除三月加息的可能，美股杜指上日大跌222點。
去到亞洲股市，內地A股尾市又急插2.9%，神奇是港股一反孱仔本色，挫後回升，非常叻仔。不過，呢個星期係期指結算，陸羽仁擔心港股咁醒係托市效應
，淡友托高個市轉淡倉，結算前頂得愈高，過後跌得愈重。
聯儲局開會完畢，會後聲明話正在「密切監視」全球經濟與金融局勢發展，將評估未來的風險平衡。部份市場人士仲未鬆一口氣，好似Wunderlich Securities首席市場策略師霍甘(Art Hogan)指出，「聯儲局未關閉三月加息之門。」美股見聯儲局無話放緩減息，即刻碌低。
神奇逆升太離奇
美股唔得，滬深大幅低開，權重股兩桶油好淡爭持，大市一度回升，到尾段三大指數再度跳水，上證指數曾大跌3.2%，上證指數收市報2655點，下跌79點或2.9%，創十四個月低位；深成指報9082點，跌339點或3.6%。全日成交量大幅萎縮。
美股同A股下挫，但港股竟然可以變神奇小子，尾市剷番上。恒指收市漲143點，報19195點；國企指數收報8028點，上升69點，成交金額754.72億元。2月份期指仲收報19273點，升298點，高水78點，成交12.46萬張。我有個不祥感覺，擔心港股能夠力抗地心吸力，係大戶做重淡倉，托高個市等期指結算，方便轉倉，喺高位開下月期指淡倉。如果大戶真係托住嚟沽，喺高位成功轉倉，咁下月可能就會插過，所以呢次彈得愈高，恐怕下月回落力愈大。
中國太平(966) 發盈喜，料純利大升逾50%，仍被大行降目標價，股價應聲急插，收造15.48元，挫6%。大和發表報告，中國太平純利大增，主要是保險業務持續兼健康增長，考慮人民幣貶值，故降2015至2017年盈利預測6至40%，目標價由40元，降至32.5元，大行睇淡內險股前景，間接都係唔看好內地投資環境。
港股反彈唔係咁全面，係令人擔心後市的原因之一。恒指今個星期彈番上萬九點，但好多股份陸續創新低，四、五線股仔紛紛爆倉，部份抽水股急急搞合併集資，甚有趕尾班車味道。
炒股仔輸錢無得怨
多隻細價股遭洗倉。恒發洋參(911) 突喪跌九成後停牌，待發內幕消息，停牌前造0.034元，大跌91%；早前獲恒發洋參購入可換股票據的銳康藥業(8037) ，股價跌4%，造0.099元；中國金石(1380) 擬股份10合1兼發盈警，股價瀉34%，報0.05元；香港教育國際(1082) 建議股份合併，半日大瀉30%，午收0.082元。
睇番恒發洋參，經過大跌九成後，市值仲有6.8億元，即係未跌前市值超過68億，高位市值更接近80億元。恒發主要從事於加拿大及美國採購種植西洋參，及向香港、中國及海外二級批發商銷售西洋參。本集團亦於上環營運兩家零售商舖，以向公眾消費者推廣西洋參知識及零售西洋參。以這些業務炒到去咁高市值，大家都知道係炒字，家損手只可以怨自己走得慢，亦驗證家走去炒四、五線股，係高危遊戲。
陸羽仁
金融High Tea 舊文
來源 source: http://hdfin.stheadline.com