一周三件：亞洲金融抵買
■亞洲金融現價貼近98年金融風暴價，圖為集團總裁陳智思。 資料圖片
亞洲金融（662）喺成個保險瓣數裏面，PB至平，兼已經跌到同98年亞洲金融風暴差無幾水位。
亞洲金融到上年6月尾每股NAV7.1元，現價2.72元PB，得0.38倍。場內內險0.9倍PB到1.6
倍PB不等，亞洲金融平霸。話經營區域唔同，無得咁比。睇番亞洲金融本身，2008年海嘯價0.45倍PB，又粗略計數，98年亞洲區金融金風暴，集團最低價對應PB，講緊0.34倍，集團家陣PB，平過海嘯價，亦跌到同98風暴差無幾水位！
亞洲金融到上年6月尾，揸淨現金20億元，又係現金牛，而集團由上年5月貼近5蚊高位，到家陣累跌45%，得番27.7億元市值，幾乎跌到落淨現金水位。
亞洲金融上年上半年盈利2.6億元，已經等於2014年全年盈利3.6億元嘅70%，半年盈利底夠厚。再講，亞洲金融有參股嘅內房瓣數，盈利又會喺今年入賬。照睇，集團就快派發2015年同嚟緊今年成績單，問題唔大。
醫療業務拓財路
又亞洲金融先後投資泰國同蒙古醫院瓣數，兼喺香港set up健康促進中心「永健坊」。食住亞洲區對醫療同康護勁厚需求，亞洲金融呢瓣一煲掂，又係主打保險業之外，另一隻金蛋。
亞洲金融勁低PB，加埋現金牛，個底有番咁上下，若果個市唔掂，股價再質，下個中線支持區約2.2元水位，呢個股價，已經好貼近每股淨現金值，兼得番0.31倍PB，殘過98年風暴價，比10年平均0.59倍PB平咗半，反彈chance面高好多。到時，可以輕輕一注。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com