財經評論：賣凶宅要夠平
■「鬼王」陳應佳近日閃賣荃
灣中心「六屍命案」單位。 資料圖片
二手物業一直存在另類成交，樓市下行周期，價錢超平的凶宅往往成市場焦點。籠統而言，凶宅至少低市價兩三成，實際則視乎該凶宅有幾凶，越凶越劈得勁，令買家覺得好「筍」肯接貨。投資老手「鬼王」陳應佳深明此理，近期閃賣荃灣中心「六屍命案」單位，減價速度絕對快夾狠。
鄰戶受累都要劈價
要講這單刁，先由較早前同層單位買賣說起，由於「六屍命案」邪門兼恐怖，鄰戶受到拖累，當中一夥去年11月以228萬元賣出，足足低市價三成，與一般凶宅價無異。
市況如此不濟，鄰戶賣凶宅價，佳叔持有的凶宅更唔值錢，遂轉軚急掟貨，12月中放盤叫價220萬元，聖誕假期後激減至168萬元，市傳除夕夜以160萬元售出，未幾根據土地註冊處資料顯示成交價更低，只賣155萬元，實呎4,144元，平過正常單位逾一半。短短兩周劈三成，市場五折價，要錢唔要貨，試問有幾多人做到？不過，佳叔持貨4年，賬面升三成，賺36.5萬元落袋，戰績不俗。
荃灣區屋苑還有其他凶宅再講講，一是在港鐵站上蓋綠楊新邨，另一在附近的愉景新城，同屬「跳樓貨」，但前者有承接，後者乏人問津，何解？同樣是驚嚇程度及價格問題。
綠楊新邨G座中層5室凶宅，三房間隔，今年1月以440.8萬元賣出，與市價有兩成半折讓。至於愉景新城5座中層兩房戶凶宅，事故於去年發生，記憶猶新，與綠楊新邨凶宅於十多年前發生事故相比，感覺更不安，加上業主去年中放盤叫價460萬元，迄今累劈一球至360萬元，較市價430萬餘元低唔夠兩成，自然冇吸引力。
此外，十大屋苑沙田第一城凶宅更多，同樣非每個業主願平賣，凶宅大王伍冠流持有48座低層凶宅，去年10月曾叫價318萬元，12月以8,800元租出，隨即封盤，以6年前購入價114萬元，寧收9厘回報好過。打聽屋苑內其他凶宅，叫價330萬元起，較正常單位叫價350萬元，只平20萬元，唔筍又點去貨呢！
記者：溫潤潔
財經評論 舊文
來源 source: http://hk.apple.nextmedia.com