摸魚手劄：提防下一隻911
■噚日恒發洋參完美表演了大股東押股後，如何被人劈價斬倉；圖為集團主席楊永仁。 資料圖片
911係一個好敏感又令人恐慌的數字。噚日股票編號911的恒發洋參完美表演了大股東押股後，如何被人劈價斬倉。另一種細股容易中伏的危機係法律風險和債務風險，西伯利亞礦業（1142
）剛好中曬。因此，要小心提防買中這類細股隱形炸彈，小心成為慘過911的被宰羔羊。
西伯利亞礦業市值只有1億元多，但翻查最近公司中期報告，公司嚴重資不抵債，淨負債超過24億元多，數字上是非常嚇人，當中也包括了公司第三批可換股票據，總值4.1億美元。「事有湊巧」地，業績公佈完後2日，公司出現跳船潮，董事會主席辭任而另一位獨立非執董亦走埋。公司本來有意頭痛醫頭，幫公司做貸款資本化，不過延遲了很多次都搞不成，連獨立財務顧問都轉過幾間。就連行內出名好打、啤建築殼第一的大有融資見到都要投降唔接呢單刁。
債務固然係問題，另一問題係法律風險。公司三不五時就有訴訟纏身，上年12月尾被提清盤呈請。上年9月就因可換股票據被傳訊令狀，相關的訴訟從無休止，要長遠擺平這些麻煩也不是易事。避得今次，總有一次難逃一劫，試問投資者點會有信心？如果純睇市值和參考殼價，你會以為好抵，但別天真。就算賣埋成隻殼畀到盡都係得6億元，成24億元債都唔知點填數，仲大鑊過亞洲電視。呢類之前炒得太轟烈的資源股真係要小心別亂撈底。
最後一段屬非財經獨白，港大學生加油。
渾水
http://www.facebook.com/muddydirtywater
本欄逢周五刊出
渾水
摸魚手札 - 渾水 舊文
來源 source: http://hk.apple.nextmedia.com