中環在線：今年滙豐員工放多一日假
全球廿多萬人受惠
獅子行員工今年放多日有薪假？係，大家冇聽錯！鑑於2015年係滙豐在港開業150周年，為答謝員工辛勞付出，滙豐香港區總裁施穎茵，原來早於舊年10月底，已經向香港全體員工發出內部電郵，指今年將會一次性額外有1天「150周年有薪假」。
至
於實際邊日放，就要各員工自行跟部門主管安排協調。不計恒生銀行（011），滙豐在港約有兩萬名員工。據聞，唔單止香港員工有多日假，集團喺全球廿幾萬員工，今年同樣獲贈多1天有薪假。呢個150周年假係一次性，2017年就冇㗎嘞。
獅子行成立150年，正日其實係舊年3月3日，呢個周年假期竟然唔係舊年放，而係今年放，都幾特別。
據聞，主要因為「一姐」施穎茵嘅通知，喺10月底先至發出，距離年底只有兩個月，未必夠時間畀所有同事喺年內放到呢日假，所以延至今年推行，時間鬆動啲咁解。至於點解舊年初慶祝時又唔講埋，就無從稽考嘞。
員工更關心加人工派花紅
滙豐近年不斷瘦身精簡，消息都係勒緊褲頭多，正能量少，今次總算反地心吸力，送贈小恩小惠。
不過從電郵10月底發出至今兩個月，消息都冇乜點樣流出市場，證明員工嘅興奮程度應該有限，可能滙豐人更加關注，今年薪酬與花紅調整多啲。多放一日假，當然都值得高興，但相對人工而言，好似變得冇咁緊要。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com