打折市
2016/01/06 09:10:54
網誌分類: 經濟
中國股市在阿爺出手護航下，大跌後回穩，全球投資者鬆了口氣，但反彈力度唔係好得，反映投資者都係「騰騰哋」，德國及法國股市只係微彈0.3%。美股亦唔靚仔，杜指中午更一度跌超過100點，午後反覆回穩，以微升9點收市，收
報17159點；標普500指數升4點至2017點，企穩2000點心理關口；表現差的是納指，逆市跌12點，收4891點。
昨日拖累美股，特別係納指的元兇係蘋果公司，Nikkei Asian Review預計蘋果公司將削減最新型號iPhone的生產量，消息令到蘋果股價大跌2.5%至102.71美元，成為表現最差的杜指成份股。
內地股市經過上日的恐怖大跌，昨日一開市又插，跟手神奇反彈，估計係阿爺怕歷史重演，又再觸發「熔斷機制」，派國家隊入市救火，股市早上靠穩，有些少進賬，但午後阿爺鬆少少手又忽然變臉急插，由上升0.7%倒跌近3%，不過睇嚟似國家隊力托大股，收市收復大部份失地，以微跌8點收場，真係一額汗。
這很可能是阿爺自去年8月股災後再次出手，當然消息未經證實，但只見重磅A股如四大內銀、內險龍頭都有大手入市，如工行A股昨日首15分鐘已經有逾3千萬股大額成交，15分鐘交易佔全日成交21%，穩住初段股價，就知買貨者有維穩動機。最後工行A股昨收市微升0.5%，H股則跌近1%，證明香港無人護盤就要跌。
除了入市，阿爺昨日維穩招不斷出，中國證監會昨開市前已表示將限制大股東減持比例，以沖淡限制減持機制快將到期的影響；人民銀行昨日再進行1,300億元人民幣的逆回購放水操作，是去年9月以來最大單一放水行動；另外人行昨日都似入市幹預人民幣?價。阿爺接連出手，叫做初步穩住內地股市。
內地股市靠穩，但港股仍然唔得，恆指跌0.7%，國企指數繼續跑輸區內股市，再跌1%，弱不禁風。大家要留意的是，H股恐怕仲有一段長時間要挨。彭博社昨日報導，打擊H股的負面因素愈來愈多，已經令到外國投資者要避之則吉。報導指，在香港上市的內地企業，去年受到中國經濟減速、人民幣貶值與企業高層因內地打貪造成流失的多重打擊，相關股份，沽壓沉重。
國企指數在上證綜指去年上升超過一成的情況下，仍然大近19.4%，成為區內表現最差股指，弱勢可見一斑。有資料顯示，H股較MSCI全球指數貼水程度達到2003年來最深。該指數市盈率為6.9倍，估值水準在彭博追蹤的股指中排名靠後，僅高於贊比亞、黎巴嫩、哈薩克和老撾股市。
然而，唔少分析指出隨著內地今年開始實施「熔斷機制」，將會令到H股雪上加霜。交銀國際首席中國策略師洪灝昨日就表示，當內地股市觸發熔斷而暫停交易，在內地無法拋售的交易員或轉而利用香港市場拋售股票。例如週一，H股在中國公佈製造業數字唔得，H股已經下跌，到到滬深300指數下跌5%觸發15分鐘交易暫停後，H股跌幅擴大，在滬深300指數下跌7%，導致A股提早收工後，H股維持跌勢。該段時間，工行（1398）
成交量主超過1600萬股，佔全日成交量6.2%，股價當時最低跌過4.5%，H股成為出貨工具。 2016年咁樣開局，都係一種捱打局面，未來主要睇外圍，中國股市暫難寄厚望，當然跌得多可能反彈，但難以大升。港股走向，會係美股走勢打一個折扣。
陸羽仁
回應(3) 我想回應
陸羽仁 BLOG 舊文
來源 source: http://blogcity.me