阿爺鬥外資
2016年01月06日
新年內地股匯大出血，港股企一企後又跌過。外資加入唱淡行列，淡友呢次開波偷襲接連得手。
未講股市前，先講人民幣匯價。外媒報道，懷疑阿爺出手托市，一度推高人仔匯價。不過，消息無官方證實之餘，人仔受周一在岸市場夜市人民幣匯價刷新四年半新低影響，買家購匯
意欲旺盛。雖然有消息指人民銀行曾入市維穩，離岸人民幣兌美元仍失守6.64關口，刷新2011年9月後新低，但跌勢放緩。另外，離岸與在岸人民幣價差擴大至1200點子，反映內地繼續限制套匯。
大行股匯齊唱淡
陸羽仁之前都話要留意人民幣匯價風險。依家好多投行同證券商擔心人仔續跌，德意志調低人民幣匯價預測，預期美元兌人民幣匯價在2016年年底會跌至7水平，較2015年年底貶值7.9%。巴克萊預期，在岸及離岸價2016年中將跌至6.8水平，並認為內地官方更看重人民幣兌一籃子貨幣走勢，可容忍對美元有較大幅度的貶值。
中金公司就坦言，人民幣近期進一步貶值風險顯著上升，認為人民幣匯率浮動性已成為主要不確定性來源。
外資淡聲淡氣，阿爺都唔敢掉以輕心。除咗匯市傳出人行干預，股市都傳出國家隊入市，掃高內銀、鋼鐵等藍籌股，以支持股市。
同一時間，隨着周五(8日)股東禁售令屆滿愈來愈近，市場憂慮會否再度觸發熔斷，中證監非正式通過交易所通知上市公司，在證監會公佈新的大股東減持股份規定之前，即使減持禁令到期，大股東仍需遵守相關禁令，不得減持，直至新規公佈，而且非正式鼓勵上市公司主動公告，延長控股股東的限售承諾。
喺外資唱淡、阿爺力托下，恒指上午一度爭持，曾經稍為回升，可惜下晝個市又轉弱，一度倒跌232點，低見21095點，尾市跌勢放緩，全日仍跌過百點收市。恒生指數收報21188點，下跌138點；國企指數收報9223點，下滑88點，成交金額724億元，雖然跌幅唔大，但以前一日個市跌近六百點計，氣氛暫時仲係差。
藍籌股中移動(941) 及騰訊(700) 跌幅擴大，合力砌低恒指67點。中移下滑2.6%，報82.9元；騰訊下滑逾1%，收147.4元。另外，匯控(005) 再破60元，跌0.83%，造59.9元。
跌市之下唔係無好消息，市場再傳爪哇控股(251) 出售灣仔告士打道大新金融中心，作價95億元，平均呎價約為2.25萬元，準買家為「亞投行」。去年底開始，巿場傳出爪哇擬出售上述物業，其後該公司發通告否認就出售訂立協議，不過睇佢呢排股價超硬淨，睇嚟都係空穴來風。
灣仔全幢商廈變皇帝女
爪哇過去半年，股價由6元多啲升上昨日的12.48元，依家市值係85億元，比傳言的售價仲要低。除咗大新金融中心，佢仲有啲發展項目同內地房地產，呢類冷門股資折讓有五成絕對唔奇，所以若然唔賣產，股價就未必可以企喺呢個位，所以如果有貨，無論信唔信佢賣產，都可以逐步減磅食胡，反正買股唔好要求賺盡最後一元，食咗胡跟住又可以搵過其他機會。
今次傳言會賣的大新金融中心位於灣仔，若然成事係華置(127) 賣萬通大廈後另一單內資掃成幢商廈交易。有地產大戶話，依家中環無晒臨海的全幢大廈賣，灣仔變成另一選擇，所以有呢類物業的公司，就好似有個皇帝女等嫁，有條件做逆市奇葩。
陸羽仁
金融High Tea 舊文
來源 source: http://hdfin.stheadline.com