財經評論：今年利是縮水
■有訪問指今年每封利是金額都「縮咗水」，半成受訪者更表明不派利是。 資料圖片
每逢年關到，一眾未婚人士當然準備喺新年𢭃多啲利是，結咗婚嘅，荷包又要出一出血！去年巿道表現差，不少老闆日日「嗌曬救命」，又話生意難撈、少咗遊客嚟使錢，更有公司將今年嘅開工利是「縮水」。作為打工
仔嘅你，有無因為經濟差而少派、少收利是呢？
雖然話派利是志在好意頭，取其凡事順利的意思，不過坊間就有潛規則巿價，一般街坊派雙封10蚊，較為熟悉嘅派雙封20蚊。早前有研究機構訪問咗千多位巿民，受訪者中近七成已婚，結果發現平均每封利是金額及總金額都「縮咗水」，打算封10蚊嘅升4%至19%，亦有半成巿民表明唔派利是，比去年微升2%；至於總共派幾多錢，一成半人話會派少啲。
過去一段時間，股巿chok得咁勁，加上樓巿跌等因素，前景會係點認真睇唔透，相信各位巿民嘅心情都跟住一齊大上大落，莫講話派利是，就連新年使錢買嘢都無以往咁「爽手」。
好似一班親朋好友，團拜時個個喊曬口，叫筆者畀幾個靚冧巴佢贏番少少（筆者對股票只略懂皮毛）；就連以往送禮兼送禮券嘅習慣都改埋，最後只係收咗幾盒藍罐（都係長輩一份心意）。
至於老闆級又如何呢？一連幾日假期結束後，打工仔最期待當然係第一日返工收老闆嘅開工利是啦！筆者早兩日和朋友聚會，大部份表示開工利是照舊係「紅衫魚」一張，而有從事飲食業嘅朋友就收到200蚊，可謂逆巿加碼。
但唔係間間公司都keep住年年派咁多，好似近年主打做內地旅客生意嘅海洋公園，由於入場人數減少，為開源節流，今年開工利是都無過去兩年咁豪，足足少咗三成至1,200蚊；不過比起你手上嗰張紅衫魚，佢都已經「跑贏大巿」啦！
新年都係想開心啫，利是派多少豐斂由人，視乎個人能力。對一般巿民而言，新一年最緊要工作愉快，賺少啲總好過「有工開但無糧出」。
記者：江靖然
財經評論 舊文
來源 source: http://hk.apple.nextmedia.com